Jowai : Ka lympung yakynjet bol Tiger Five wa mar san ngut chiliang ha Chilliangraij ynne da man ko ha pyrdi ki 6 tylli ki dhab. Ha ka yalehke wa nyngkong heipor 1:00 i sngi ka Risa 4 Miles da yaleh pyrchah ko ya ka All Star SC heiwa ka Risa 4 Miles da yoh chwa ko wow pynkhih ya ka jaar ha ka minit wa nyngkong lyngba u Chanki Iakai Jersey No. 10, ka yalehke man ko kawa yathaiñ bha heiwa neiliang kiwa yalehke yong ka All Star da yalehchitom ki wow sai yei buit yong ki hadooh wow yoh ki u su ya ka kool ha ka minit wa 27 lyngba u Mararki Patwet Jersey No. 8, kamtæ ka yalehke yong ka kylla step man ko kawa ya draw mar chi kool.
Ha ka kylla miet yong ka yalehke kiwa yaleh yong ka Risa 4 Miles da sai lut ki yei bor yalehke yong ki hadooh wow yoh ki u ban ya ka kool wa ar ha ka minit wa 35 lyngba u Wanni Nongrum Jersey No. 11, du hadien kattu katni por ha ka minute wa 44 da yoh biang ko u thap ya ka kool wa le lyngba u Damang Kyndiah Jersey No.3, ka All Star SC dei leh bha yong u Kenny Patwet Jersey No.15 da yoh u wow thap ya ka kool wa ar ha ka minute wa 53. Hadein neini na waroh arliang da pyrchang ki wow pynchkeh tangwa hadooh wa kut i por ym em de wa yoh wow thap ya ki kool. Kamtea ka Risa 4 Miles man ko ka dhab kawa jop da 3-2 kol. Arngut kiwa yalehke yong ka All Star SC da yoh ki ya ka Yellow Card katwa uwi wan na ka Risa 4 Mile.
Ka yalehke wa ar heipor 2:30 janmiet heiwa ka Chiruplang SC yalehpyrchah ko ya ka K.C. Combine SC. Ha kani ka yalehke man ko kawa jem chiliang heiwa neiliang ka Chiruplang SC da pynjem ko khnap næ ya ka K.C. Combine deiwa thap ko ya ki khynde tylli ki kool. Ya ka kool nyngkong da thap da u Shiningstar Lamurong Jersey No.14 ha ka 2 minit, ka kol wa ar na u Marbiang Suchiang Jersey No. 4, kawa le na u Bahnah Pyngrope Jersey No. 2 ha ka 23 minute, kini ki kol neh ki hadooh wa kut yong ka kylla step heiwa ka K.C. Combine ym em u yoh ko u su tang kawi leh ka kool.
Ha ka kylla miet ka yalehke, ka Chiruplang SC da sdang biang ko wow ban ya ka kol wa soo ha ka minit wa 33 wada thap da u Marbiang Suchiang Jersey No. 4, ha ka minute wa 42 da thap ya ka kool wa san da u Dari Thma Jersey No. 6, ka kol wa ynru da yoh da u Marbiang Suchiang Jersey No. 4, kawa ynniaw da thap Biang da u Dari Thma Jersey No. 6 ha ka minit wa 45, ka kool wa phra da thap da u Masan War Jersey No. 15 haka minit wa 48 katwa ya ka kool wa khynde da yoh wow thap da u Mailu Paswet Jersey No. 17. Katwa neiliang ka K.C. Combine SC da yoh ko wow su du kawi donhi ka kool wada thap da u Manly Dkhar Jersey No. 11 ha ka minute wa 52.
Kamtea ka Chiruplang SC man ko ka dhab kawa jop wei da psiah ko cha ka Second Round, heijooh i por man ko leh ka dhab kawa thap bun kol dooh ha kani ka first round. U Stone Pillar Jersey No. 1 yong ka K.C. Combine da yoh u ya ka yellow card.
Ka yalehke wa khaddooh yong ka First Round da sdang hei por 3:30 janmiet heiwa ka Young United SC da yaleh pyrchah ko ya ka Mynthong SC. Hakani ka yalehke kawa yoosuk bha u pait neibhah na waroh arliang pynyoo ki yeitea i mynsien yalehke nei bynta wow yoh yaka naam jop. Ya ka kool wa nyngkong da sdang wow pynkhih da ka Young United heiwa da thap da u Ishwa Sumer Jersey No. 16 ha ka minit wa 16, katwa neiliang ka Mynthong SC da yoh ko wow su ya kani ka kool lyngba u Deepak Chettri Jersey No. 15 ha ka minute wa 15. Ka yalehke yong ka kylla step kut ko da mar chi kool. Ha ka kylla miet ka yalehke man ko kawa yathain hadooh kattea kattea heiwa ha ka minit kawa 40 dei bakla yong uwi uwa yalehke yong ka Young United ya ka kol kawa mut u wow yada da lai pathan ko cha kol (own goal) heiwa ka Mynthong da yoh ko ya kani ka kool kawa ar. Kamtea hadien kani ka Own Goal, ka Mynthong nang yoh bor chooh chooh ko hadooh wa yoh biang ko wow ban ya ka kool kawa le ha ka minute wa 52 lyngba u Me-U- Ru Suchen Jersey No. 8, katwa neiliang ka Young United ye ko u su ya ka kool wa ar ha ka minit wa 55 lyngba u Abbha Syngkon Jersey No. 6.
Kamtæ hadooh wa kut i por ka Mynthong da yoh ko wow ksoh ya ki le kool katwa ka Young United da neh du ar kool donhi. Ka Mynthong da man ko ka dhab jop 3-2 wei da psiah ko cha ka Second Round.
Ha ka Second Round yong ka yalehke kawa daw sdang ha ka tayaw wow wan, Ka Umshangiar SC u yaleh pyrchah ko ya ka Mynthong SC, ka Elsa SC pyrchah ya ka Risa 4 Miles, ka Chiruplang SC pyrchah ya ka Khliehryrchi SC, katwa ka Super Galaxy SC u yaleh pyrchah ko ya ka We United. Yei por wa ka tarik yong kini waroh daw pyntip hadien.
Ka Second Round kawa da man ko leh ka quarter final u sdang ko ha ka 16 tarik hei por 3:30 janmiet ha pyrdi ka Mynthong SC pyrchah ya ka Umshangiar SC.
Discussion about this post