Ka West Jaintia Karate Do Championship 2025 wa da pynman dei yakrehlang ka West Jaintia Hills Karate Do Association, Jowai deilang ka Directorate of Sports & Youth Affairs, Meghalaya Shillong ha Jowai dapoi ko cha wa kut ha ka 13 tarik uni u bnai hei sakhilang u Ksan Kupar Warjri, Treasurer Meghalaya State Olympic Association, Shillong & General Secretary AMKA, Shillong kam u kongsan wa u Hunlang Lytan, President AMKA, Shillong kam u symbood kongsan.
Ha ka yalang wa tbian yong i pynkut ya kani ka yakob hei pynlai u Alan Niangti, President WJHKA, Jowai, neiliang Hunlang Lytan, President AMKA, Shillong kam u symbood kongsan e u i yaroh ya ki dkhot ka WJHKA kiwa da kitkhia wow pynkhai im ya kani ka seiñ wei wow pynchlur e mynsien leh ya ki khynnah wow sniawsuk ka-it ki ya ka lehke Karate.
Ong chooh u leh nujor ha ki por wa dalai wa ki por wa katni ki aiñ ki kyndon yong ka Karate kylla ki na ki snem cha ki snem kamtæ kyrsu kyntu u ya ki dkhot ka WJHKA wow man kiwa tip ya ki aiñ ki kyndon yong ka Karate khnang yow ye chooh u pynjanai yei rukom krehkaam ka Association katkam i yah ka juk ka por.
U Ksan Kupar Warjri kam u kongsan hei klam, kmen u wow yoo wa dei chimkhia ki dkhot ka WJHKA ki khynnah, ki khynroo khyllood wa em sap yong ka chnong Jowai ha ka yalehke Karate yohlaad biang ki u mih pyrthai wei ini da pynsabut lyngba i yoh u yoo u sakhi yei mih yachimbynta ki khynnah ha ka Meghalaya Games, ka State Tournament kiwa dadep u pynman ha kini ki bnai wa dadep wei kani pynyoo ko ka dak yong i kyrmen wa ha ki por ki wow wan, ka West Jaiñtia Hills District u ye chooh ko u sai u pynmih chiboon kitæ ki khynnah kiwa ye u rah naam rah burom ya ka District, ka jylla lyngba ka yalehke Karate.
Ha ki ar sngi yong kani ka yakob da yoo yei chongchit ka-it ki khynnah hei synranlang ki manbei manpa wow yachimbynta u pynyoo pyntaw sap lyngba ka Kumite wa ka Kata kiwa man katkam ki kyrdan, ki rta wa da booh ryntih da kiwa pynlai yong kani ka Championship.
Napyrdi kiwa chimbynta wa boon, ki khynnah kiwa dayoh u rah yei naam kam kiwa chimbynta wa kynsai nae ki Best Karateka yong kani ka Championship 2025 toh neibynta ka kyrdan Sub Junior Boys wa da rah da u Pusaimi Kyndiah, Junior Boys da rah da u Kerda O Pyrbot, Senior Boys da rah da u Same Wan I Pakma katwa neiliang won ki kynthai hei kyrdan Sub Junior da rah da ka Fidashisha M.K. Lyngdoh, hei Junior da rah da ka Phisaka Bamon katwa ha ka Senior won da rah da ka Durka Passah.
Ya ki Medal wa ki Best Trophy cha waroh kiwa jop da saam da u kongsan, u symbood kongsan wa ki dkhot yong ka WJHKA wei khaddooh chwa wow poi chawakut, u Ribeit-O Pde, Oranising Secretary WJHKA e u ki kyntien sñiawngooh.
Discussion about this post