Ka Lion Sports & Youth Affairs (LSYA) ka Mission Compound, Jowai ha ka sngi Pynsin 8 Duiatra 2022 da pynkut ko yei lehkmen dap 25 snem namo ka Silver Jubilee Celebration heiwa u Banteidor Lyngdoh, Minister Sports & Youth Affairs, ka sorkar Meghalaya dawan u kam u kongsan hei emlang u Phasmon Dkhar, EM JHADC kam u symbood kongsan, u A.A. Shullai, MDC Jowai Central wa kiwi ki waheh wasian, manbei manpa wa chah khut sñiawbha.
Ha ka yalang wa chongkun yong kani ka sngi hei pynlai u Donkupar Syngkrem, President LSYA da yoh yei puræ na ka Bible wa i duwai wada e da siang na ka khyllood Pynhun Shylla katwa u Pynhiam H. Kharkongor, Adviser LSYA da khana pynsñiaw u hakhap u waboon walang chaphang i parom wa tbian yong i lai luti ka Lion Sports & Youth Affairs.
U Phasmon Dkhar hei e kyntien kam u symbood kongsan yong kani ka sngi da e mynsien u ya ki khon khynroo khyllood wa ki diahkhian waman ki mynried yong ka dong ka chnat wow imsngi u pynmiat pynjanai yei yi iwa da yoh pateiñ na ki warim waheh nachwa. Chooh chooh wow pynsahkynmoo ya kani ka sngi i wan yong oo da em leh i pynlait paidbah ya ka Thup Sahkynmoo Silver Jubilee Celebration.
U Banteidor Lyngdoh, hei e kyntien kam u kongsan da yaroh u ya ka LSYA kawa da chimkhia wow yah luti ya ki khon khynroo khyllood wei da ong u leh kani toh man ka nongmuna wabha ya kiwi ki chnong ki thaw. Chooh chooh kam ka dak wow pynsah kynmoo yeini i wan yoohkjat yong oo da pynlait paidbah u leh ya ka Riti Krehkam næ Constitution ka LSYA wa kamjooh leh ya ka Music Video kawa da chna hajrong ka sur rwai wa ong Yutran warim wa sein nachwa, ki khmat salan u nang pynmiat pynbha.
Neiliang u Banteidor Lyngdoh ha kani ka sngi da e sñiawbha u leh ya ka Lion Sports & Youth Affairs, Mission Compound da ka Computer wei da kular u leh wa ha ki kajiak sngi yong uni u bnai ka Badminton Carpet wada dep mang poisa u yoh noh u booh ha kani ka thaw.
