Ka Facebook da pynkylla ko yei pyrtuid yong ka cha ka Meta iwa man kam chibynta i thong yong ka wow lai chakhmat palat ya ki Social Media deiwa sdang sa ki Virtual Reality (VR).
Ini ym mut wa daw pynkylla ya ki rynsan Social Media kiwa daw neh da i jooh kam ka Facebook, Instagram wa WhatsApp iwa pynkylla toh du yei pyrtuid ka Company donhi kawa mantre ya ki.
Ini da wan i hadien wa ha kini ki tayaw wa dep da mih boon ki pynbaad pyrchah ya ka Facebook na ki wakreh warim yong ka wa pyrkhat ko yei nong donhi ym em kwah ki wow yada ya kiwa pynemkaam ya ki rynsan yong ka khamtam ki kynthai.
U heh ka Facebook u Mark Zuckerberg da pynbna u yei kreh wow sdang ya ka “Metaverse” kawa man kam ka pyrthai Online kawa ye u yachem wa kiwi ki bru, u yaklam wa ki deiwa pynemkaam ya ki VR Headset.
U Zuckerberg da ngait u wa ka Virtual Reality toh ka mynried yong ka Internet heiwa heithaw wow pynemkaam da ki Computer wow leh yei kaam ye ki wow leh pyn da ki hi deiwa pynemkaam da ki Headset yow psiah chapoh ka Internet heiwa daw man kam kawi won ka pyrthai (Virtual Reality) wa ye u yachem, u riam u bait kam cha pyrthai hi.