Jowai: Wot hapyrdi i maham i suiñbneiñ wow pynhaap slap, tangwa da ki hajar ngut ki paaid wa ngait ka Balang Katholik na ki Parish waphær waphær ka Diocese Jowai na ka Archdiocese Shillong, Diocese Nongstoin wa na kiwi leh ki Balang na ki chnong wa marjan da tooid ki cha Sanaro, Namdong Parish ha kani ka 5 tarik uni u bnai wow ya sakhilang ya i pynkyntang Lyngdohsohblei (Lyngdohniam) ya u Gregorius Syntem wei da man u u Lyngdohsoblei, uwa nyngkong dooh wa ka Parish Namdong da pynmih ko.
Ha i por 10 waje i step da pynman ya i knia Mass Eucharist wa ka lehniam pynkyntang Lyngdohniam ya u Deacon Gregorius Syntem, da u Most Rev. Victor Lyngdoh DD, Bishop ka Diocese Jowai ha i emlang wa i synran lang ki Lyngdohsohblei napoh ka Diocese wa na baar. Ha chwa wow sdang ya ka knia Mass wakhooid, da em ka lehniam pynkyntang Lyngdoh katkam ka riti ka dustur yong ka Balang.
U Bishop Victor Lyngdoh da pynsñiaw u ya i kmen wa khroo ya i smat yong u Gregorius Syntem wow raikut wow man kam u Lyngdohsoblei wow kreh ha ka Brisohwain yong u Tre Kynrad wow chakri ya u Blai rap bha wa ya ki para bru wei wa man u leh u Lyngdohsohblei uwa nyngkong uwa ka Parish Namdong da pynmih ko. Hadien i lehniam pynkyntang Lyngdohsoblei da pdiang ya u Deacon Gregorius Syntem cha ka kynhun yong ki Lyngdohsohblei hapoh ka Balang.
Discussion about this post