Jowai: Ynne ka sngi yaka kari thymme wa pynmih da ka NISSAN kawa tip kam ka MAGNITE da pynlait paidbah yaka ha Orange Datsun Showroom, Jowai da u Awhai Andrew Shullai, MDC ka Jowai Central, hei emlang ki bru waheh naki dong waphær waphær, u phadar H. Lamare Parish Priest ka Jowai Diocese wa kiwi kiwi.
Chwa u pynlait yaka kari da yoh yei klam pdiang burom na u General Manager u Kyrshan Khongwir.
U Managing Director, u Shemphang Lyngdoh ong u ya kani ka kari da pynlait ha Jowai neibynta u pynsuk yaki paidbah ka Ri-loom Jaiñtia heiwa ym emkaam de ki u lai pait næ leh Test Drive chadooh cha Shillong.
Da ong u leh wa kani ka kari man kawa rap phær i myntoi wa ye u yoh naka lada wyrchaw wa kiwi tawan ki kari wa yajan i dor kawa em Camera ko yow pait chadien, chakhmat, cha tidiang wa timun wei i dor leh man iwa biang nalor kiwi won ki myntoi.
Ka NISSAN Company ym em mut ko wow pynlai yaw ya kani ka kari du kat ha India tangwa haka pyrthai hi waroh kawi, katwa toh kawa da chna ha India kamtæ da wai nyngkong chwa yaka ha India.
Heiyatoh wa i lai luti ka NISSAN kattu la 5 snem hapoh Meghalaya, ong u wa neiliang ki bru yong kani ka Company da ye lut ki wow pynbiang i chakri yow paidbah ha kiwa boon ki liang.
Ya ki paidbah kiwa sñiaw swe u mih na yung ha kam kini ki por, kyntu u yaki wow pait yaka Showroom yong ka NISSAN lyngba ka Internet deiwa lai ha www.Nissan.in, wa heini leh ye ki u yoo lut yaki kari (Model) waphær waphær wei wot u Book Online kamjooh.
Pyntip haroh u wa manda pynlait paidbah won yow Test Drive, lada ki bru swe ki u wan cha Showroom, ye leh wow lai da ki cha man ki yung bru neibynta ka Test Drive, heiwa neiliang ka Company chwa u lai daw pynkhooid næ Sanitize chwa ko yaka kari.
U kongsan yong kani ka sngi u Awhai Andrew Shullai da e yaroh u ya kani ka Company, deiwa ong kani ka Company wym em wan ko du kat u kamai ha Jowai tangwa pynyoo ko leh yei yoh chaniah naki paidbah.
Kamtæ kyntu u yaki paidbah wow chim kabu ki ya iwon iwon i myntoi wa wan hajan, wei pyn-eh bok eh nasib u leh ya kani ka Company wow nang ku ko chaphrang.
