U montri ka chnat Disaster Management ka jylla u Kyrmen Shylla da pyntip u wa da dep wow pynkreh poisa neibynta ki District wa chah ktah hei bor ka rymaw ini wa dep nei chlai um wei nei oor khyndaw iwa da wanrah nei joor u slap.
U Kyrmen da pyntip u wa da pynlait T. 50 lak cha ki DC ka East Khasi Hills, T. 30 lak cha South West Khasi Hills wa T. 20 lak cha ka West Khasi Hills. Ya kani ka poisa da pynlait yow ye u su smat cha kitu ki manyung wa dooh yei mynsien bru kamjooh cha ki manyung wa da chah ktah na ini i jia.
Da ong u leh wa yaka Report wa bniah yong waroh kiwa da chah ktah na ini toh kawa dang yang.
Da khana u leh wa ini wa dep ki le tylli ki District kiwa chah ktah dooh toh ka East Khasi Hills kawa da maad yei boon i oor khyndaw iwa da ktah ya kiwa boon ki yung wei da dooh leh ya 8 tylli ki mynsien bru nei oor khyndaw.
Ha South West Khasi Hills, da pyntip u wa haka Jeep wa kit bru kiwa chah rah ha ka wah, 6 ngut da dooh yei mynsien yong ki katwa 2 ngut da lait im ki wei cha kini ki manyung wa em wa khlaad da e T. 4 lak samen.
Ha West Khasi Hills, da dooh yei mynsien yong ki 2 ngut, 1 ym pu chem hadien wa ka kari wa lai luti ki da chah tymmoh ko haka um heipor wa dang lai luti kani ka kari ha u sarok. Da em leh boon i oor khyndaw ha kani ka District iwa da ktah ya ki paidbah. Wei yaka poisa da dep e cha ki manyung wa da dooh yei mynsien.
