15 25.4396136 92.1960997 1 0 4000 1 https://wyrta.com 300 0
theme-sticky-logo-alt
theme-logo-alt

Neidaw wym yoh yei jubab naki Company sahkut ki kaam takit manda chah thok ki bru lyngba ka Internet

Advertisement ad1

Kamwa 10,000 tylli ki Case da man ki kiwa sahkut waka Cyber Crime Cell ki pulit ha Pune hadooh u Naikhynde uni u snem katkam wa pyntip u Sambhaji Kadam, Deputy Commissioner of Police, Cyber Crime waka Economic Offence Wing katkam wa pynmih khubor ka Hidustan Times.

Da ong u wa i wym e jubab ki Bank, ki tre ki Social Media, Internet hadooh ki Telecom Service Provider da wanrah ko yeini i sahkut wei wow ye u pyndep yaka takit.

Advertisement ad1

Ka Cyber Police da ye ko wow pynuiñ kamwa T. 8.5 klur cha kiwa ujor haki 650 tylli ki Case hadooh u Naiynñiaw uni u snem tangwa palat ar chah kiwa wan ujor da dooh ki yaka poisa yong ki. Wei kini kiwa boon toh kiwa chah pynbiej wow khana wei wow e yutip khlem da suba wa daw chah thok ki.

Ha uni u snem, na ki 1,1175 sien wa da paan yutip ki pulit na kini ki Company da e jubab ya ki 905 tylli, da kyntait ya 465 tylli katwa ya kiwa sah ym em e jubab ki.

“Da em ki por wa da pynkynmoo ya i jooh 15-16 sien yow paan yutip yow ye u pyndep yaka takit, tangwa ym jooh yoh jubab wei da emkaam yaki sorkar wow tuklar ki yow yoh yei jubab heipor wa biang,” da ong u Kadam.

Ki pulit jooh thoh ki cha ki sahep wa pait ya ini lane cha ka Computer Emergency Response Team, India (CERTIn) kawa em hapoh ka Ministry of Electronics & Information Technology. Tangwa ym toh waroh ki por wa yoh yei jubab.

“Ha kiwa boon kini ki Company da booh ha iwa boon i por du uwi u bru wow leh ya ini uwa da khut kam u Nodal Officer uwa pyllang yutip yow jubab yei thooh ki pulit,” da ong u Sandip Gadiya u bru wa chemphang haka kaam Cyber Security.

“Em wa boon ki daw wa ym yoh yei jubab, ye u man waka chithi ym em che bha ko hawa khana chaphang iwa jia kamjooh ki kyndon ka aiñ wa da pynkrehkaam. Em ki por wa ki Account wa paan yutip em ki cha baar ri, kini ki Nodal Officer ym ye ki wow e jubab kamjooh wa lada ki kyndon aiñ wa da pynkrehkaam ym yahap wa iwa jia. Em leh ki por wa yaka yutip wa paan ki pulit toh kiwa booh cha baar ri lane ki thaw pyllang yutip wa tip kam ki Server em ki cha baar ri,” da ong chooh chooh u.

“Iwa chem chitom toh hawa booddien yei lai ka poisa. Lada chem leh, u chem won ya ka Account yong u tre wa wan kani ka poisa toh iwa eh. Boon ki por toh wa ya kini ki kaam thok da leh na ki thaw wa em cha baar ki thaw wa embor ki pulit kiwa leh yaka takit. Hei yong sakhiat toh u man ko wa kini ki Company hap ki wow e yaka yutip hawa paan,”da ong u Vishal Murakilar uwa man kam u muktiar uwa yasait yaki kaam Cyber Crime.

“Em hi kiwi ki laad wa ki pulit kamjooh kiwa ujor ye ki wow chim tangwa poi ma poi ha i bien kini ki Company wo ya krehlang waki pulit,” da ong won u.

Share this:
Previous

I pynsñiaw ki paidbah hadien wa da chah yaki khynnah Class 6-8 wow lai biang ki cha skur

Next

Da pynlait wei da su yaka poisa cha ki manyung wa dooh yei mynsien bru nei bor ka rymaw: Kyrmen Shylla