I Music Video wa e pyrtuid “Kyrwiang Wa Tlem” kawa da thoh kyrpang heiyatoh waka chnong Shangpung, West Jaiñtia Hills District da pynlait paidbah ka haka 25 tarik uni u bnai da u khon ka chnong hi, u D. Langstang, Chief Engineer, PWD Roads ka sorkar jylla, ha YouTube Channel “Byrken” hei sakhi lang ki khon ka chnong kiwa chong wa sha ha Shangpung hi wa kamjooh kiwa da chong da sah cha Shillong, Jowai wa kiwi tawon ki thaw.
Ya kani ka Music Video da pyntoh pyntne wei pynwandur da ka seiñ wa tip kam ka “Shangpung A Tribute Project” ka seiñ wa da sdang da ki khon ka chnong Shangpung hi kiwa da chong da sah cha kiwi won ki chnong tangwa heipor wa lait da liwan chnong bait ki yow yoh yachemlang, yachem yumut wei pyrkhat neibynta ka chnong.
Kamtæ kani ka Music Video toh kawa nyngkong wa da pyrchang ki u leh neibynta ka chnong.
U Rev. A.R. Suchiang kam u dkhot kamjooh uwa thoh yeini i sur, khana u wa yeini i sur da thoh u heipor wa em ka khlam COVID, i por wa waroh hap u ya chong yung, wei neidaw wa boon i eh i khoo hei lai luti chimpor wow pyndep.
Ong u wa lyngba ini i sur kwah ki wow pynyoo u khana heiyatoh waka chnong Shangpung, wei ki khon ka chnong wa em sap hei rwai, i tem i put leh yoh laad ki u chimbynta wow pynyoo yei sap yong ki.
Neiliang u Damewanmi Suchiang won khana u ini i sur toh iwa da chna kyrpang neibynta ka chnong Shangpung neibhah hadooh kamwa man kattæ wym pu em i sur deilang i Video wow pynyoo yei khroo i yoosuk ka chnong Shangpung.
Wei heiyatoh wa ka Ri-loom Jaiñtia boonsien hi iwa wan hei thij i pyrkhat ki bru toh ka thaw tih mooyong namo ka thaw pynmih ya ki mar poh khyndaw wa pynsih ramaw, tangwa oo hi won ong u, ka Ri-loom Jaiñtia em ko boon kiyi kiyi wa yoosuk kiwa dang rieh kdong ki wym pu bna pyrthai tangwa lyngba kani ka Video yooluti u wa i naam yong ka u nang ku ko, wei ki bru ha kylleiñ ka jylla leh yoh ki u yoo u tip ya ka chnong Shangpung.
Pyntip u wa ya kani ka Music Video da riñ dur leh ha ki thaw waphær waphær wa em ha kani hi ka chnong yow pynyoo yei yoosuk wa em ha ka, wei hei lai luti ong u wym toh iwa suk khamtam wow yachem lang chirup neibynta u pyntoh pyntne ya kani ka Video neibhah wa da ya sah ki kylleiñ kylleiñ.
Ha ka yalang wa pynlai da u C. Langbang, Dolloi Elaka Shangpung uwa man leh u Chairman ka “Shangpung A Tribute Project” da yoh i klam tbian na u Tbn. R.D. Sungoh, i rwai na u Danbinton Pohdweng wa u paralok, i rwai na ka Deisukijai Langstang wa ka Daehunmika Langstang wa i klam e khublei na u Tbn. W.M. Law.
Discussion about this post