Ka sorkar jylla da pynsñiaw ko wa i em ki tadong LPG Cylinder biang hi ki hadooh katni tangwa hap pyntikna deiwa pait bniah wa ym em kiwa leh palat wei kiwa toh hok u yoh ymtoh u dooh ki.
U Montri ka Food & Civil Supplies ka jylla, u Methodios Dkhar da ong u wa ka LPG ym em ware duna ko kam ha kini ki por wei ym em hi leh u pahooh ko kamwa jooh man chwa ka thma Iran wei neiliang ka sorkar u pyntikna ko wa ki tadong LPG Cylinder u poi ki cha ki manyung wa em hok.
Da ong u wa katkam ka yutip wa yoh wa ki ujor wa em ki bru wa chim kabu ha kam kini ki por deiwa dai tooh hei dor wa heh wei da maham ya kiwa dai LPG hei dor Rs. 2,000-3,000 ha kini ki sngi. Da ong u wa ka Sorkar da booh ko ya ki Vigilant Committee wa khlieh da u Chief Secretary ha ka jylla wa ki Deputy Commissioner ha ki District wa lada em kiwa dai tooh toh u ujor ki wut-wut khnang wow pynchitom ya ki.
Heiyatoh wa ka LPG wa pynemkaam ha dukan namo ki Commercial Cylinder da ong u wa kini ki LPG da rap duna ki neibhah wa ka sorkar India da pynduna ko da 20 percent neiwa jooh e nachwa.
U Methodios da ong u wa ka sorkar jylla da thoh ko cha u Minister of Petroleum and Natural Gas ka sorkar India, u Hardeep Singh Puri wymtoh u pynduna ya ka LPG neibhah wa da man ka jylla wa da ku bha ha ki kaam uiñke suwari heiwa ka sorkar Pyrdi da rap pynku ko u phah ya ki LPG ha kini ki sngi.
Heiyatoh wa i leh ya ka eKYC, u Methodius da ong u wa nadooh nachwa da em i phah ya kiwa pynemkaam LPG wow pyndep ya ka eKYC wei katni dang pynbor wa hap wow leh ya ka wow lait nei leh thok khnang wow yoh lang waroh ym du ki jooh donhi ki bru.
Hajrong i hap book biang 25 sngi hadien wa yoh ya ki Cylinder, u montri da ong u wa kani toh kawi na ki laad wow ksoh nei pynemkaam bakla deiwa book ki jooh bait ki bru.
Discussion about this post