I yakhun pyrchah ya ka khlam COVID-19 haddooh ynne ka sngi dang pteiñ i wei kam chibynta wow pynneh pynsah ya ka luti wa da lai heiyatoh wa i yakhun pyrchah ya kani ka khlam, ynne ka sngi da pynlait ya ka kot kawa khana ya i parom wa tbian yong i yakhun ka Dorbar Chnong Panaliar pyrchah ya kani ka khlam ya kawa da e pyrtuid “A Short Journey Of The Chnong Panaliar During The Fight Of COVID-19”.
Ya kani ka kot kawa da thoh da u Waheh Chnong ka Panaliar, u Riquoma RQ Laloo da pynlait ha ka yalang wa man ha Yungwalieh ka chnong heiwa u ADC ka West Jaiñtia Hills, u Lyngkor Kynjing da man u kam u kongsan katwa u MDC ka Jowai South, u Saron Paswet won da man u kam u symbood kongsan.
Ya kani ka yalang da pynlai da u Secretary ka Education Committee, u RK Petrous Rymbai heiwa da yoh ya ki ktien ngooh Blai na ka Waisa Sumer wei da pynbood ya ki kyntien pdiang burom na u Waheh Chnong ka Panaliar, u Riquoma Rq. Laloo.
Neiliang u Riquoma hawa e yei klam da ong u wa da thoh ya kani ka kot dei mynsien wa sñiawkhia hajrong ka luti wa lai ka chnong hei yakhun pyrchah ya kani ka khlam COVID-19 nadooh ka 23 Wisu hadooh 30 tarik u Naikhynde uni u snem heiwa da khana ya ki kaam wa da leh ka chnong ha kini ki bnai.
U Saron Paswet hawa e yei klam da yaroh u ya uwa thoh ya kani ka kot wei wa da yaroh u leh ya ki khon ka chnong kiwa da yaleh wow yakhun pyrchah ya uni u COVID-19 nadooh wa sdang.
Da kyntu u leh ya ki paidbah wow man ki kiwa lehkhooid neibhah du lyngba i lehkhooid wa i bood ya ki kyndon wa booh ka sorkar daw ye u yada na ka khlam COVID-19.
Neiliang u kongsan, u Lyngkor Kynjing hawa e yei klam da ong u leh wa boonsien ym em iwon iwon i yajan para bru ha ka imlang sahlang tangwa nei wan u COVID-19 da wanrah u yei yatylli wow yakhun pyrchah ya kani ka khlam.
Chooh chooh da ban u wa katni da sdang yoo wa da rap kheiñstiñ ki bru wei na ini i daw da sdang ku kiwa yoh ya uni u khñiang ha Jowai katwa kamtæ emkaam bha wow bood ya ki kyndon ka sorkar.
Da ekhublei u leh ya ka chnong kawa ym em pyrchah yei pynemkaam ya ka Maternity and Children Hospital wow sumaar ya kiwa yoh COVID-19 hapoh ka District.
Chwa wow pynkut, da yoh ya ki ktien e khublei na u Careme Phawa uwa man leh kam u General Secretary ka Dorbar Chnong Panaliar.
