Jowai: Kam i dak wow yarap ya iwa eh wa khia wa chon ya ki paidbah wa chong chnong khamtam ya kiwa dooh wa duk wa rangli kiwa yachem yei eh ha kam ini i por wa em boon ki kyndon sorkar nadooh ka Lockdown wow yada nei poor ka khlam COVID-19.
Neiliang ka Meghalaya People United Front (MPUF) Khliehriat Circle, ynne ka sngi ka 31 tarik da lai e sñiawbha ko da u khoo cha ki manyung wa dooh wa duk yong ka chnong Ladrymbai Khliehdupon, East Jaiñtia Hills District.
U President ka seiñ u Kyrshan Blah hawa e yei klam yong oo ha chwa wow saam ya u khoo da kyntu ya kiwa yoh myntoi waroh wow man ki kiwa kohngooh ya ki hukum sorkar kitæ nadooh wa pynyajngai uwi na uwi (Social Distancing), wow pynemkaam ya ki yada deiwa pynemkaam da ki Mask kiwa ye hi u chna pyn da i hi.
Da emlang ha kani ka sngi u Secretary chnong u S. Haiong wa u President VDP u B. Sana.
Ka seiñ da pyntip ko wa daw pteiñ biang ko wow saam ya ki laad yarap ha kini ki sngi wow wan.