Ynne ka sngi uwi uwa chna phlim na Assam, u Bhaskar Kiran Bora da wan u cha Jowai ymtoh wow riñ Video wei chondur tangwa ha kani ka kynti da wan u cha Jowai wow pynlait ya ka kot kawa da thoh u hei ktien Assamese ya kawa pyrtuid ka Jaiñtia Pahar namo Ri-loom Jaiñtia.
Ya kani ka kot da pynlait da u Dolloi ka Elaka Jowai, u Puramon Kynjing ha yung krehkaam yong oo ha ka yalang wa tbian.
Neiliang u Dolloi da kitbok u ya u Kiran wa da ye u wow thoh ya kani ka kot ka wow pynmyntoi ya ki bru na Assam wow sñiaw wei wow tip chaphang ki Pnar na Ri-loom Jaiñtia.
U Kiran da khana u wa arphaw snem nachwa da wan u sakhi u ya ka Behdieñkhlam wei da yapbiej u ya ka rukom im ki jaitbru Pnar wei ini da pynbor i ya oo wow ngam yillu wow sñiawthooh ya i rukom im yong ki wa ka niam ka rukom.
Chooh chooh da pyntip u wa hanla kani ka kot da thoh dei Assamese tangwa angnood u leh wow pynkylla ya ka chei ktien pharæng.
U Bhaskar toh uwa ka’it wow riñ Video wei chondur wei man uwa chna phlim uwa da pynwandur ya kiwa boon ki phlim khamtam ka phlim Pnar wa pyrtuid Man I Sa.
Ya u Bhaskar jooh yoo ki paidbah chirup wa ka kurim u heipor Behdieñkhlam, Chaad Sukar wei da uiñ u leh ha kylleiñ ka Ri-loom Jaiñtia ha ki arphaw snem wa dalai wei da thoh u ya kani ka kot dei pynbor ka kurim u, ka Priyam Bora.
Ha kani ka kot da thoh chaphang ka parom ka Hima Jaiñtia, ki rukom im, ki rukom baam, ki riam ki bait, chaphang ka Niamtre wa kiwi kiwi.
Discussion about this post