U chong bichaar ka Select Committee yeiwa pynbait ka Delimitation Committee ka KHADC

Ka Yung Dorbar yong ka Khasi Hills Autonomous District Council (KHADC) da rai ko wow phah chwa cha ka Select Committee ya ka Report ka Delimitation Committee, kawa da tyrwa yow pynbait thymme ya u pood u ang yong ki 29 tylli ki MDC Constituency ka KHADC.

Ya kani ka rai da chim hadien wa u Deputy CEM, u PN Syiem da wanrah u ya ka Report ka Delimitation Committee hapoh ka dorbar lyiur ynne ka sngi, ya kawa da e kti cha ka Executive Committee yong ka Council ha ka 8 tarik uni u bnai.

ADVERTISEMENT

Hawa pynsñiaw yei wym pdiang ya ka Report, uwa yahkhmat ka Liang Pyrchah, u Titosstarwell Chyne da ong u wa ka EC da wanrah jhan ko ya kani ka Report khlem da e por ya ki dkhot ka yung dorbar wow puræ wei bichaar bniah wei neidaw wa i thong yong ka Delimitation Committee toh yow pynbait thymme yow man kamjooh i heh u pood u ang ki Constituency wa i em kiwa thap Vote, wei neidaw wa ka Committee ym em kdaw ko yei em kiwa thap Vote ha man ki Constituency, kamtæ khnang wow e laad ya ki dkhot yong ka yung wow puræ wei bichaar bniah chwa ya ka Report, da emkaam wow phah chwa ya ka cha ka Select Committee.

U Titos da klam che u wa i wym pdiang ya ka Report  ym mut wa ka Liang Pyrchah pyrchah ko ya ka Report yong ka Delimitation Committee kawa wanrah hapoh ka Yung Dorbar.

Related posts

Hapoh dorbar ym lait ki tang u ang tangwa cha lait pynheh ki kam ki rem dorbar pynksan cha baar, ong u Titos ya ka EC ka VPP

June 26, 2025

Wanrah i ka mang tangka kawa boon dei yoh yei lut | Da pyndam leh ya ki Committee wa pynlut phut: VPP

June 24, 2025

Hawa pynsñiaw yei mynjur yei e yumut ka Liang Pyrchah, neiliang u Deputy CEM da ong u wa ka yung pdiang ko u phah chwa ya ka Report ka Delimitation Committee cha ka Select Committee.

Neiliang u Chairman ka Yung Dorbar da pynbna syndon u ya ki dkhot ka Select Committee deiwa mynjur yong ka dorbar, kiwa kynthup ya u Deputy CEM, u PN Syiem kam u Chairman wei kiwi ki dkhot toh uwa yahkhmat ka Liang Pyrchah, u Titosstarwell Chyne, u Jambor War, u Bindo Lanong, u Lambor Malngiang, u Balajied Rani wa u Secretary ka EC kam u Member Secretary.