Jowai: U District Magistrate, West Jaiñtia Hills da pynmih hukum u ynne ka sngi wa yaka hukum wow pynman Containment Area yaki 7 chnong ha West Jaiñtia Hills, wa kynthup ya Amlarem, Krangpamtdong Amsarim, Ladjaplem Amshipai, Lai Lyngdoh wa Amlatdoh wa em hapoh Amlarem Civil Sub-Division, da pyndam ka nadooh 6:00 AM ka 1st August, 2020 hadooh wa pynmih hukum da kamwi.
U District Magistrate da pyntip u leh wa yaka hukum da pyndam hadien wa da pyntip ka Health & Family Welfare Department, West Jaiñtia Hills District wa da dep leh yaka Contact Tracing kamjooh ki e sikai (Behaviour Change Management).
Ya ini i pyndam ya kini ki Containment Area da u District Magistrate, da booh leh ya kini ki kyndon ha wah:
- Ki waheh chnong ka Amlarem, Krangpamtdong, Amsarim, Amshipai, Lai Lyngdoh wa Amlatdoh deiwa ya krehlang waka Administration (Civil), ki pulit, Civil Sub-Division Amalrem u pynbait ki yei rukom wai ki dukan, ki yaw wei wow bood leh yaki kyndon wa da pynmih daka Health and Family Welfare Department.
- Ki Village COVID-19 Management Committee deiwa ya krehlang waka Administration (Civil), Block Development Officer C&RD Amlarem Block ki Health Officials, Civil Sub-division, Amlarem u pait ki yei kylla i rukom im ki bru yow yada kamjooh hawa em ya u COVID-19 deiwa deiñ yaki Mask hawa em ha ki thaw paidbah, u yajngai uwi ya uwi kamjooh wow man kiwa lehkhooid yei kti.
- Ki paidbah da pynchlur yaki wow yajngai ki deiwa bood yaka Social Distancing deiwa yajngai 2 meter (6 feet) uwi na uwi, ym toh wow khynnia ha iwi i thaw lane i dukan, ym toh wow dam u deiñ Mask, ym toh wow mynthu haki thaw paidbah, u leh khooid, u pynkhooid yaki yung kamjooh ki soo dong, ym toh wow noh roi yei jhep. Ki tre dukan leh toh u pynkhooid bha ki yaki dukan yong ki wa ki bynta cha lait man-ka-sngi wei wow ya krehlang wa ki District/Sub-Division Administration, pulit wa kiwa pynlai chnong.
