Kam chibynta wow pynpoi yei sumaar sukhær cha ki chnong ki thaw wa jngai dooh, neiliang u Chief Minister ka Meghalaya, u Conrad K. Sangma ynne da pynlait paidbah u ya le tylli ki kari Mobile Medical Units (MMUs) ha ka yalang wa pynman ha Shillong.
Kini ki kari toh kiwa da pynyoh da ka Altius kam chibynta ka CSR yong ki wow yarap ya ka imlang sahlang wei da pynkrehkaam da ka Apollo Foundation – Total Health. Kini ki kari sumaar bru (MMU) u e chakri ki cha ka thaaiñ Mawpat, Pynursla wa Baghmara kiwa em kamwa 93 tylli ki chnong wa palat 2 lak ngut kiwa chong chnong katkam wa da chim yukheiñ ka Apollo Foundation – Total Health.
Ka Mawpat wa Pynursla toh ki Community and Rural Development (C&RD) Block wa em ha East Khasi Hills District katwa ka Baghmara toh kawa em ha South Garo Hills District. Hapoh ka thaaiñ Mawpat em 45 tylli ki chnong, ha Pynursla 26 tylli wa ha Bagmara 22 tylli ki chnong.
Ha kawi pa kawi kani ka kari MMU da emlang u Doctor, ka Nurse kamjooh ki tiar ki tar deilang ki dawai wa emkaam wow sumaar jhan wei daw wan ki leh wow booddien ya kiwa chah sumaar wei lada emkaam yow phah lai cha ki thaw sumaar.
Discussion about this post