Ynne ka sngi kam chibynta wow lehwarom ya ka World Oral Health Day neiliang ka Department of Dentistry ka NEIGRIHMS da pynman ko ya i pynsñiawthooh paidbah hajrong i chait i khiah yong i poh-ktien namo ka Oral Health Awareness Program.
Ya kani ka lehwarom da sdang da i klam Radio hajrong ka Oral Health Awareness lyngba ka All India Radio ha ka 20 tarik uni u bnai heiwa u Dr. Nathaniel Kharumnuid da man u kam uwa e ya ki kyntien batai.
Ynne ka 23 tarik da pynman ya ka yakob phet hapyrdi ki khynnah puræ MBBS wa Nursing yong ka NEIGRIHMS ya kawa da kaweh lama da u Director ka NEIGRIHMS, u Prof (Dr) Nalin Mehta. Ya ka yakob da pynman neibynta ki chynrang wa kynthai heiwa ya kiwa jop da yoh ki ya ka takma waka Certificate.
Da pynman leh ya i pynsñiawthooh ha OPD Foyer ka NEIGRIHMS heiwa da emlang u Director Prof. (Dr) Nalin Mehta, Dean Prof (Dr) Asima Bhattacharya, Medical Superintendent Prof (Dr) C. Daniala, Prof & HOD Department of Dentistry Prof. (Dr) S. Vijay Singh, Dr. Lomtu Assistant Professor Department of Dentistry wa kiwi kiwi.
Neiliang u Prof. (Dr) Nalin Mehta da ban joor u yei emkaam u yoh ya i chait i khiah i poh-ktien (Oral Health) wei kammon u yada na kiwi ki jait kjut. Da khana u leh ya ki rukom wa kammon ktah i dih wei baam ya ki duma ya i chait i khiah ki bru kamjooh ya ka soodong sookun.
