Da pynman ya ka 8th Winter Annual Camp ki khynnah Scout-Guides ha West Jaiñtia Hills

Kamwa jooh man ha ki snem wa dadep, ha uni u snem leh ki bor pait bor pynlai ka Meghalaya Bharat Scouts & Guides, West Jaiñtia Hills District da chim biang ki wow pynman ya ka yachemlang wa chisien chisnem wa tip kam ka 8^th Winter Annual Camp & Youth Leadership Training 2024.

Ya kani ka 8^th Winter Annual Camp Cum Youth Leadership Training da sdang nadooh ka 6 tarik wei ka wow kut ha ka 10 tarik uni u bnai wei da pynman ya ka ha Achiever’s Secondary School, Ummulong, Thadlaskein Block.

Ya ka yalang wai pynemburom ya kani ka Winter Camp da pynlai da ka S. Tariang, Vice-President MBS&G, West Jaiñtia Hills dei sakhilang leh da u D. Syngkon wa mihkhmat na ka yung krehkaam yong ka District School Education Officer, West Jaiñtia Hills hei emlang u Ohiwot Laloo, Jt. State Secretary MBS&G wa u Trippleson Muksor, Principal Achiever’s Secondary School, Ummulong.

U Ohiwot Laloo, Jt. State Secretary MBS&G hei e kyntien ha kani ka yalang yahkhmat da khana u yei parom wa tbian chaphang ka Winter Annual Camp wa nyngkong kawa da pynman ha u snem 1994 ha Madan Syntu Ksiar kamtæ nadooh utæ u snem hadooh katni ka District Association pteiñ ko wow pynman ya kani ka Winter Camp ha ka thong wow e sikai ya ki khynnah Scouts-Guides chaphang ka rukom dustur yong ka Scouts-Guides Movement wei chooh chooh leh kyrpang da e sikai ya ki khynnah chaphang ka Leadership.

Related posts

Yoh myntoi ki 31 ngut ki khynnah ka Jaiñtia Hills nei pooid wa mynkna ya kiwa jæd ktien wei kaad poh ktien

November 16, 2025

Khut ka DCIC Jowai ya kiwa kwah wow yoh yei sikai wa mynkna neibynta ka Make Up Artistry

November 16, 2025

Neiliang u D. Syngkon hawa e kyntien da yaroh u ya ka District Association yong ka Meghalaya Bharat Scouts & Guides, West Jaiñtia Hills kawa da ye u leh chiboon ki kaam neibynta ka imlang sahlang wei chooh chooh da kyrsu kyntu u ya ki khynnah Scouts-Guides wow man kiwa tip u ri syndong yei akor i burom ha kiwon kiwon ki bynta wa im ki wei da ong u leh e wa iwon iwon i tip i chemphang wa yoh lyngba kani ka Camp u saam u e phi ki cha kiwi.

Khaddooh chwa wow poi cha ka bynta wa kut yong kani ka sngi da e kti leh ya ki Certificate cha waroh ki khynnah Scouts-Guides kiwa da yoh ya ka Rajya Puraskar Award 2024 wei pynbood won ki kyntien khublei na ka Dolly Lamare, District Orgainser Guides, MBS&G, West Jaiñtia Hills.