Sñiawngooh ka KSU wa da pynmih hukum yow pynchna ya u sarok na Lama cha Hingaria deilang ka yingkieñ Pusi

Ka Khasi Student’s Union Hingaria Unit, East Jaiñtia Hills District da pynsñiaw ko yei sñiawngooh ya ka sorkar hajrong i chimkhia wow pynlait ya ka Preliminary Work Order neibynta wow chna ya u sarok wa dang sahteiñ na ka chnong Lama chadooh wah Prang Hingaria wei wow pynchna leh ya ka yingkieñ ha ka wah Pusi kawa pynyabi ya ki chnong ka West wa East Jaiñtia Hills.

Kam wow pynkynmoo wa ka seiñ hapoh i yahkhmat u Garnes Talang, General Secretary rynkat wa kiwa yahkhmat chnong yong kitai ki thaaiñ wa khynthup ya u Samson Lamin, waheh chnong Hingaria, u Kyrmen Swer, waheh chnong Borghat, u Lap Suchen, waheh chnong Natbor wa u D. Lamare, ha 17 tarik u Naisan da lai e dorkhat ki cha u Chief Engineer PWD (Rds) Central Division, Shillong yow kyntu yow pynchna noh ya u surok wa da sih phrai nadooh na Lama chadooh wah Prang Hingaria neibhah wa da booh hei eh ya ki paidbah wa lai wa wan yong ka thaaiñ khappood hi waroh kawi wei hei booddien yong ka seiñ klem sangeh, neiliang ka sorkar da ye ko wow pynkrehkaam deiwa booh ka mang poisa wa Rs. 16 klur yow pynchna ya u sarok nadooh ka chnong Lama chadooh wah Prang Hingaria najrong wa da booh kani ka mang poisa, iwi i kreh leh dang lai chaaid chaaid nadooh wah Prang chadooh Sonapur hei lut wa Rs. 126 klur.

ADVERTISEMENT

Kamtæ hajrong kani ka bynta, ka seiñ da sñiaw ko leh wow e khublei kyrpang u ya u Chief Engineer wei kamjooh ya ka MLA ka thaaiñ kawa da chimkhia yeini i ood i naam yong ka seiñ ryngkat kiwa yahkhmat yong ka thaaiñ wa lyngba kani ka sarok ki chnong wa em ha khappood nadooh ka chnong Lama, Borghat, Natbor, Demlakang, Pdeinwah Khynriam, Kwator, Hingaria, Huroi, Lahalein, Lailong, Lejri ter ter chadooh Sonapur daw pynsuk noh ko ya ki kiwa da hap u maad yei eh wa boon ha ki snem wa da lai khamtam hawa kjut wa chitom.

Da em leh ki por wa da dooh yei mynsien ha chiteiñ luti neidaw wym ye wow poi cha thaw sumaar heipor wa biang.

Related posts

Dang pyrkhat ka sorkar wow pynkhlan ya ka MRSSA wei ye leh u wanrah da kawi won ka aiñ

July 19, 2025

Dawa ka HITO wow booh sa kawi ka Anganwadi Centre ha chnong Laskeiñ

July 19, 2025

Kamtæ da kyrpaad leh ya ka sorkar wei khamtam ya ka MLA wa emburom wow booddien wei wow phah ya u Contractor wow pynkreh smat ya uni u sarok ha kini ki bnai tlang kam ka dak wow e yei chakri wa bha tam kam ka dak e sñiawbha snem thymme ya ki paidbah ka thaaiñ hi waroh kawi.