Ka yung krehkaam ka District Mission Coordinator, SSA West Jaiñtia Hills dei ya krehlang ka RMSA-West Jaiñtia Hills deilang waka ALIMCO, RMC-Guwahati nadooh ka 24 tarik hadooh ka 26 tarik uni u Naisan da pynman ki ya ka Assessment Camp ha ki le tylli ki Block yong ka District wa kynthup ya ka Thadlaskein, Laskein wa Amlarem Block yow thooh ya kiwa em i duna hei doh i pran.
Ha ki le sngi yong kani ka Assessment Camp ha man ki Block, ki manbei manpa dei sñiawkhia ya ki khon ki nat yong ki da wan ki wow yachimbynta u yah u chdooh ya ki khon ki kti yong ki wei wow pynyoo hakhmat ki bru ka ALIMCO, RMC-Guwahati yei man i long ki khon yong ki hadien neitæ won ki bru ka ALIMCO, RMC-Guwahati u ye ki u leh yeiwa emkaam neibynta i myntoi yong ki khynnah kiwa toh hok sakhiat u yoh yei yarap wa kyrpang.
Ki bru na ka yung krehkaam yong ka SSA Meghalaya kiwa da embynta ha kani ka Assessment Camp toh ka M. Kharbyngar, State Coordinator IE SSA-SEMAM Shillong, u L.K. Singh, District Coordinator, IE SSA West Jaiñtia Hills wa kiwi ki Volunteer katwa neiliang won ka ALIMCO, RMC-Guwahati da mihkhmat da u Ashok Pratap Singh, Audiologist, u Sonu Kumar, Orthotist & Prosthetist wa u Hritik Jaysonwal, Data Monitor.
U L.K. Singh da khana u wa ka thong yong kani ka Assessment Camp toh wow pait u sylli bniah ka ALIMCO ya kitu ki khynnah wa em i duna hei man rynyieñ rynyiot nadooh kiwa puræ ha ki skur hadooh kiwa em ha ki yung ki sem wow wan ki chakhmat u pynyoo yei man yong ki khnang wa na kani ka Assessment Camp ka ALIMCO, RMC-Guwahati u ye ko u wanrah i yarap cha ki khynnah hei dur ki tiar kam ka Wheel Chair, ki CP Chair, ki Crutche, ki Smart Cane wa ki Braille Kit neibynta kiwa thlah, ki Multi-Sensory Inclusive Educational Kits neibynta kiwa duna bor jabieñ, ki Hearing Aid neibynta kiwa duna bor chkoor kiwa man chibynta wow pynsuk yei rukom im yong kini waroh.
