Ka Sanshnong Umngot Fishing Association, Headquarter Sohmynting West Jaiñtia Hills ha ka 25 tarik uni u bnai da yoh kem ko ya 8 ngut ki bru wa tynyap dusmon ya ki dohum hapoh ka wah Umngot, itæ toh deiwa khyndang lyngka ki ya ki moo tæ pynyang jaar bniad.
Kini ki bru toh kiwa naka chnong Thadan, East Khasi Hills wei hadien wa dep bichaar ka seiñ, da pynlait noh ko ki pyn ha katai hi ka sngi.
Heijooh i por ka seiñ da maham joor ko leh wa lada chem ko ya kiwon kiwon wa pynyap dusmon ya ki dohum ha kani ka wah u ngat ki hei chah pynchitom katkam wa chah ka aiñ.
Ki kyndon wa ka seiñ da booh ko neibynta u yada yaki dohum ha kani ka wah, kynthup i wym chah u dat bom, ym chah u bær ki kynja dawai bih, u pakhot jaar, u sngoh tyrnem, u khyndang naar lyngka, u rah kiad, tangwa toh u khwe doh deiwa pyndem khwe kti donhi.
