Kam chibynta yong ka ‘Pan-India Awareness and Outreach’ wa man leh kam chibynta ka lehkmen yoh laitlood wa 75 snem ka ri kawa da e pyrtuid ‘Azadi Ka Amrit Mahotsav’ deilang i lehkmen ya ka ‘Legal Services Week’ da pynman ya ka Cycle Rally da ka District Legal Services Authority-West Jaiñtia Hills (DLSA-WJH), chirup wa ka yung krehkaam u District Sports Officer ka District.
Ya kani ka Cycle Rally da kaweh lama da u DSO, u K. Passah na i thaw sdang ha Kiang Nangbah Stadium, Ladthadlaboh heiwa kiwa chimbynta da em ki 45 ngut.
I thmu wow pynman ya kani ka Cycle Rally toh yow kynmoo ya ki khlawait ka ri kamjooh yow pynchlur yei pynemkaam ya ki Cycle.
Ya kani ka Rally da sdang na Kiang Nangbah Stadium wei da lai luti na Ladthadlaboh Main Road, New Hill, Iawmusiang, Mynthong, Chutwakhu, Mission Compound, Iongpiah, Dulong, Tpep-pale wei da pynkut biang ha Kiang Nangbah Stadium.
Chwa wow sdang ka Rally da em ka yalang heiwa da yoh i klam na u DSO, u K. Passah wa na uwi na kiwa mihkhmat ka DLSA.
