Jowai: Ka Pongshai SHG kawa man kawi na ki Self Help Group (SHG) kawa kyrchaan da ka Society for Urban and Rural Empowerment (SURE) waka National Bank for Agriculture and Rural Development (NABARD) da pynman ko ya ka e sikai wa chi sngi ya ki warep sapdok kiwa em haka chnong Kremlabit Ksehrynchang, West Jaiñtia Hills District wei da pynman ki ya ka esikai ynne ka 13 tarik.
Ya kani ka e sikai hajrong i myntoi wa i eh i khoo wow rep sapdok da pynman ha yung skur yong ka ka dong Kremlabit ka chnong Ksehrynchang kawa haap hapoh ka Thadlaskein block wei ya kani ka e sikai da yarpa poisa da ka yungkrehkaam u District Planning Officer, West Jaiñtia Hills district, Jowai.
U kongsan ha kani ka sngi u Rev. H.H.Mohrmen uwa man leh kam u Secretary yong ka SURE da yaroh u ya ka Pongshai SHG kawa da ye u pynman ya kam kani ka e sikai kawa ye u yarap ya ki warep ka chnong. Da ong u leh wa neiliang ka SURE da yoo ko yei chitom ki warep ha kini ki tayaw wa dadep heiwa da haap dai tohdor ya u sapdok, kamtæ neiliang yong ka seiñ ka Farmers’ Producer Organisation da yaleh ki wow thooh yaaw wow dai ya ki ya ki mar rep yong ki.
Ha kani ka e sikai da yoh na u List Join Niang uwa man kam u Assistant Director District Horticulture Marketing yong ka West Jañtia Hills District, uwa da ong wa ka rep sapdok ha kini ki thaaiñ da ku bha ko ha kini ki sngi tangwa neidaw wa katni i dor sapdok da hiar dor i, neiliang yong ka Director yong ka tnat Horticulture da yachem ki wa kiwa rep wow yaklam wa ya ki wow booh noh da i dor wa duna dooh kawa ym pynhiar dor de namo ka Minimum Support Price khnang wa kiwa rep ym dooh nong ware ki.
Neiliang u Niang da ong u leh wa sa iwi leh ka daw toh wa ki warep yong i da chaniah ki ha i symbe wa da chna da u bru wa tip kam ki Hybrid kamtæ da kyntu ya kiwa rep wow kynchew symbe hi da kiwa mih na i hi yow lait na ini i chaniah tylli ha ki symbe Hybrid wa pynmih da ki Company.
Da pynchlur u leh ya kiwa rep wow rep ya u syiñ uwa man leh u mar rep wa mih bha hapoh ka Thadlaskeiñ Block.
Discussion about this post