Shillong: Ka Hills State Peoples’ Democratic Party (HSPDP) da pynsñiaw ko wa da rai ko wow nehlang wow krehlang hadooh wa kut ha ka sorkar synrop Meghalaya Democratic Alliance (MDA) wa yahkhmat da ka National Peoples’ Party (NPP) ha ka jylla.
Ya ini da ong da kiwa yahkhmat ka HSPDP ynne ka sngi hadien ka yalang ka Executive Committee ka HSPDP East Khasi Hills neibynta wow pynkhreh ya ki phang wow rah ha ka General Council ka wow man ha ka 4 tarik Naichiphaw.
Hawa yaklam wa kiwa pathai khubor, u President ka HSPDP East Khasi Hills, u Martle N Mukhim da ong u wa katni da man ko ka juk yong ka sorkar synrop, wei kam ki party wa yakrehlang ha ka sorkar toh u ya tylli ki kam kawi ka yung ka sem.
“Hawa em i ha ka sorkar synrop i haap i wow yakrehlang wa kiwi ki party wei toh u man i kam chi yung chi sem, i toh u kreh i deiwa sñiawthooh yumut wei lada em i tam næ i duna i heini heitai toh u pynbait deiwa sniawthooh,” da ong u Mukhim.
Da ong u leh wa ha ka sorkar synrop toh u ya krehlang deiwa mylliñ yei sñiaw yaphær party deiwa krehlang ha ka jooh ka yurim.
“Ka HSPDP u kreh ko haka jooh ka yurim waka sorkar MDA, i da kut yumut i wow kyrchaan tylli ya kani ka sorkar MDA,” ong u Mukhim.
Discussion about this post