Jowai : Ka Sri Sankaradeva Netralaya Guwahati hei krehlang chirup wa ki bor district ka West Jaintia Hills wa ka District Blindness Control Society, Jaintia Hills ynnin da pynman ya ka Free Diabetic Retinopathy Camp ha ka Science Hall, Circuit House, Jowai neibynta ki bru kiwa em 40 snem cha neiñ. Heiwa da wan chimbynta hadooh 206 ngut ki bru kiwa da yoh myntoi.
Ha chwa wow sdang da em ka yalang tbian heiwa pynche chaphang ini i kjut heiwa u Secretary, Heath & Family Welfare Department u K.W Marbaninag, da man u kam u kongsan katwa u Medical Director and Trustee Sri Sankara Deva Netralaya Guwahati, u Dr. Harsha Bhattacharjee won da man u kam u symbood kongsan.
Ha kani ka yalang pynche yeini chitom da em leh u Additional Deputy Commissioner , West Jaintia Hills District, u D.P Kharsati, u DM&HO, West Jaintia Hills District, Dr. I. Tongper, Adviser Ophthalmology cum Member Secretary MBSC Dr. M.S Nanghuloo, wa kiwi kiwi.
Hei klam kam u kongsan u K.W. Marbaninag da e khublei e yaroh u ya u Dr. Harsha Bhattacharjee wa ki bor district wa da ye ki u pynman ya kam kani ka prokram khamtam kiwa chitom Diabetic Retinopathy. Da ong u leh wa emkaam u biang i rukom baam yow yoh yei chait i khiah.
U Dr. Harsha Bhattacharjee hei klam ha kani ka yalang da pynche u yei wa kammon u leh wow yait ya ini i kjut. Heijooh i por da kyntu u ha ki nongpynlai wow chimkhia ki heiwa heiwi tawan i por toh u leh neibynta ki bru waroh khlem booh yei rta neibhah wa katni kani ka kjut chini (diabetes) man ko kawa poi heiwon heiwon i rta.
Discussion about this post