Ynne ka sngi da pynman ya ka yakob neibynta ki khonboo wa chait wa khlan namo ka ‘Healthy Baby Show’ kawa pynman da ka Chutwakhu Urban Primary Health Centre, Jowai.
Kani ka sngi man ko leh ka sngi wa khaddooh yong ka Ayushman Bharat Health & Wellness Day kawa da sdang nadooh ka 1 Naitung hadooh 14 Naitung 2021.
Ha kani ka sngi da em ka yalang wa tbian heiwa da yoh yei klam na ka Medical Officer kani ka UPHC, ka Dr. Rudeimaia Passah kawa da pynlait leh ya ka Poster heiwa da khana ya ki jait sumaar (Service) wa e ha kani ka thaw wa kynthup wow e sumaar ya ki khonboo, ya kiwa hapoh 20 snem i rta, ya kiwa da heh rta kam kiwa em BP wa chini, Cancer, i chitom ki chkoor wa kiwi kiwi.
Da pyntip ko wa ka Tele Consultation da sdang ya ka ha u Naichiphaw 2020 heiwa ha kani ka thaw daw ye u yaklam wei wow yoh dawai na ki Doctor chemphang (Specialist) lyngba ka Internet.
Ha kani ka yakob da wan yah hadooh 17 ngut ki khonboo wei da pait ya ki ha i heh, sngaid katkam i rta wa kiwi kiwi ki bynta.
I khon ka Lumlang I Kynjing da yoh i ya i naam jop, bood won sa i khon ka Lisa Sumer heiwa ar wei neitæ won i khon ka Arwotkiru Challam iwa yoh yei naam wa le.