Jowai: Neidaw wa em kiwa yoh COVID-19 wei da em leh kiwa em hei maa wow yoh ya uni u khñiang kiwa yachem wa kiwa yoh ya uni u khñiang kamjooh kiwa yachem pateiñ, kamtæ da emkaam wow leh yei booddien, i leh Quarantine, ki Test wei wow khangkset yow yada yaki paidbah nei poor uni u khñiang.
Kamtæ u District Magistrate, West Jaiñta Hills da pynmih hukum u ynne ka 9 tarik yow pynbna ya waroh kawi ka Khlieh Ait-nar, Iongpiah, Jowai kam ka Micro Containment Area chi syndon yow khang yei psiah i mih khlem da yoh bor cha ini i thaw hadooh wa pynmih hukum da kamwi.
Kani ka hukum da phah ko yaki bru wa em hapoh ka Containment Area wow neh bait ki hapoh yung wei kiwa em cha baar ini i thaw wym toh u psiah ki cha kini ki thaw.
Da khang wow pynman ya kiwon kiwon ki jait yalang, ym chah wow wai kiwon kiwon ki dukan, ki yung krehkaam sorkar kamjooh ki yong ki bru samen kiwa em ha kini ki thaw.
U Assistant Sector Magistrate, Jowai Urban u man u kam u Supervising Officer kani ka Micro Containment Area.
Kani ka hukum ym em khang ko ya ki wakreh Health, ki wakreh (Essential Worker) ka Jowai Municipal Board, ki laad pathai khubor, ki Petrol Pump wa kiwa li booh tadong LPG.
Ya kiwa leh pyrchah daw pynchitom katkam ka Disaster Management Act, 2005 waka IPC.
