Ka Ferdy School of Martial Arts (The Revolution MMA) da yoh ko wow pynman ya ka yakob wa tip kam ka Online Inter Club Shadow Kickboxing Challenge neibynta ki chynrang wa ki kynthai ha ka kyrdan Sub-Junior, Junior wa Senior Level.
Ya kani ka yakob da sdang nadooh ka 11 Naikhynde 2021 hadooh ka 9 tarik uni u bnai heiwa da em 9 tylli ki Club kiwa da chimbynta na kylleiñ ka Ri-loom Khasi wa Jaiñtia.
Kiwa chimbynta ha kani ka lympung Online da kynjoh ki cha ka 75 ngut ki khynnah kynthai wa chynrang heiwa da pynchlur leh ya ki wow chimbynta ki ha ki kaam yalehke Sports kam ka Martial Arts khamtam ha kam ini i por wa wan ka khlam COVID-19 yow yoh yei chait i khiah.
Kam wow kdaw heini ka Ferdy School Of Martial Arts da man ko leh kam kawi na ki Club na ka jylla kawa da jooh jop ha ki lympung yalehke ka ri wa kynthup ya ka Jeet Kune Do, Wushu wa kiwi kiwi.
Ha kani ka kynti yong ka lympung Inter Club Shadow Kickboxing Challenge da rah ya i naam jop da ka Ferdy School Of Martial Arts heiwa da bood won sa ka Smit School of Martial Arts katwa yei naam wa le da yoh da ka Pynshai School of Martial Arts na Lumparing.
Neiliang ka Ferdy School Martial Arts da ekhublei ko ya ki Club waphær waphær wa da wan chimbynta ki ha kani ka lympung.
Ya kiwa chimbynta ha kani ka lympung da bichaar da u Donny Ranne uwa man leh u International Referee ha ka Kickboxing, u Niawki Ïakai uwa man leh kam u National Wushu Referee, u Sambormi Lyngdoh uwa man kam u Coach ka Revolution MMA wa u Baremdor Kharmuti na ka Madanrting Martial Arts and Physical Fitness Club.
Ya ki Video yong ki kattu katni ngut kiwa chimbynta ye phi ki u sakhi heini hawah:
