Jowai: Ka yung krehkaam District Horticulture Officer, East Jaiñtia Hills Khliehriat ynne ka sngi da pynman ko ya ka yaaw pynyoo rong ya ki mar rep, mar riang wa da pynmih da ki warep ka District ha pchem ka skur Khliehriat Higher Secondary School kawa tip leh kam ka 6th Exhibition Cum Seminar on Horticulture Crops 2018.
I thong yong kani ka yaaw pynyoo rong man ko leh kam chibynta wow pynchlur ya kitu kiwa da uiñ biang cha ka kaam rep yong warim deiwa pynemkaam da ki sboh wa pynmih ka rymaw.
Kamwa ong ka phang ha kani ka sngi Organic Cultivation-‘Key to better livelihood’ iwa mut i rep deiwa pynemkaam da ki sboh rymaw daw wanrah ko ya i khih wa bha.
Ka E. Suchiang District Agriculture Officer East Jaiñtia Hills District ha i klam yong ka da ong ko wa ka sorkar da chim ko ya ka rai wow kyntu ya ki warep wow rep biang da i sboh ka rymaw hadien wa yoo wa duna bor i khyndaw hadien wa pynemkaam da ki sboh dawai wa chna da u bru kiwa neh boon snem ha i khyndaw iwa ktah yei man sboh i khyndaw katwa ka sboh ka rymaw won pynbha pynmiat ko ya i khyndaw.
Da pyntip ko leh wa ki stat sayan da chem wa ki baam wa mih deiwa pynemkaam sboh dawai wanrah ki leh ya i kjut wa boon jait.
“Lada wyrchaw ha ki por wa da lai noh ym da em ware ki bru kani ka thaaiñ wa em ha ka kaam rep tangwa katni won da wan biang ki cha ka kaam rep kaam riang” ong ka D. Suja ADC, East Jaiñtia Hills District Khliehriat hawa e yei klam kam ka kongsan.
Da ong ko leh wa ha ka ri India hi boon ki bru ki im ki deiwa rep wa riang tangwa lada wyrchaw haka thaaiñ yong i ympu ye u ong wa lyngba ka rep da im ja wei da ye u pyndap nadong chadong i emkaam ha yung ha sem hanlada kattæ leh da ong ko wa ym toh u dooh mynsien wei kamwa yoo na ki maar rep wa da pynyoo rong ynne ka sngi da man ko kam ka dak wa em kyrmen hi.
Chooh chooh da ong ko wa lada ym man i leh kam kitæ ki warep kiwa ye u e sikai wa kiwa ye u pynpoi ya ki mar cha baar tangwa da ye u pynbiang yeiwa emkaam samen hadooh katwon pynmyntoi ko ym du wow yoh u baam kamjooh leh ka chait ka khiah.
Ha kani ka sngi ka Suja da pynkynmoo ko leh yeiwa emkaam u man kiwa leh khooid yow yoh leh yei chait i khiah, wei emkaam wow sdang na yung yow pynbood won sa ha ka imlang sahlang kamjooh leh yow pynduna yei pynemkaam Plastic.
Kiwi kiwa klam ha kani ka sngi toh u L. Hinge, District Horticulture Officer, East Jaiñtia Hills District, u P.S. Suchen, ADH, Mkt wa kiwi wei da saam leh ya ki khusnaam cha ki warep wa jop ha ka yakob pynyoo rong.
Discussion about this post