Ampati: Ki warep na ri-loom Garo ynne ka sngi da yachem lang ki ha ka yaaw ki warep kamjooh leh man ko ka sngi wow pynyoo rong ya ki mar rep ha Ampati Multi Facility Centre.
Ya kani ka yaaw da pynman da ka Meghalaya Basin Management Agency (MBMA) chirup wa ka Basin Development Unit (BDU), Ampati yow yohlaad ki paidbah leh u tip chaphang ki mar rep wa da dep song (Value Addition).
I thmu kani ka yaaw toh yow yohlaad ki warep u sñiawthooh yeiwa emkaam u dai ya ki mar rep ym du kiwa dep khait tæ dai wot emkaam leh u chna leh ya ki cha ki jait baam wa boon jait yow ye u dai heidor wa heh kamjooh deiwa booh ya i pyrtuid (Brand Name) ha ki yusong daw man ki kiwa chaniah ki paidbah u thied.
Ha kani ka sngi da wan ki bru wa chemphang kam u Rajesh Patidar, Vice President, Agriwatch, New Delhi, Biplab Sarma, Commodity Analyst, Agriwatch, New Delhi, u Dr. Abhigyan Bhattacharjee, Associate Professor, NEHU, ka North East Green Tech Private Limited, APEDA, Organic Majuli, Mission Organic wa kiwi kiwi.
U DC ka South West Garo Hills kamjooh leh u Chairman ka IBDLP u Cyril Darlong Diengdoh da ong u wa ka sorkar thooh laad ko wa kammon u pynku ya ka lap ki warep khamtam hapoh ka jylla heiwa kiwa boon toh ki warep wei lada pynemkaam ki da ki sboh wym em dawai wa chna ki bru wa tip leh kam ka Organic Farming daw pynku ko yei dor ki mar rep yong ki.
U Director ka MBDA wa ka MBMA u Daniel Ingty da kyntu u ya ki warep wow krehlang wa ka sorkar yow kynrong ya ka yoh ka kot yong ki khamtam ya ki mar wa rep khlem pynemkaam dawai yow sñiawthooh u booh thong kamjooh yow pyllai yaaw ya ki.
Discussion about this post