Jowai: Ka Jowai Civil Hospital DM&HO, Jowai CNE (Continuing Nursing Education) Cell ynne ka da pynman ko ya ka CNE Conference on Adolescence Health kawa man ka sien wa nyngkong hapoh ka thaaiñ neibynta ki nurse hajrong ka phang: “Adolescent Health Care: Opening Window of Opportunity for Healthy and Positive Development of Adolescents”.
Ya ka bynta wow wai ya kani ka Seminar da emlang u Dr. R. Pohrmen, Medical Superintendent Jowai Civil Hospital, Ialong. Ka Dr. Rita hei klam yong ka da yaroh ko ya kiwa pynman kamjooh ya ka Nursing Committee wa ye ki u pynman ya kam kani ka Conference wa nyngkong kam cha kani ka thaw wei da jied leh ya ka phang wa yatoh wa emkaam u klam chaphang i chait i khiah yong kiwa dang khai khynroo.
Da ong ko leh wa katni ha pyrthai ki khynroo toh kiwa boon dooh lada wyrchaw na ki por wa nachwa heiwa na ki 7.3 Billion ngut ki bru wa em hapoh pyrthai 1.2 Billion toh ki khynroo wa kiwa dang khai khynroo wei na kini waroh 22% em ki hapoh ka ri India.
Kamtæ hapoh ka jylla Meghalaya leh emkaam wow chimkhia ya ini wow pynsñiawthooh ya kiwa dang khynroo yow ye ki u heh u san ha ka luti wa toh.
Da ong ko leh wa boon ki kjut wa mih hi sdang ki u sooh-thied nadooh i por wa dang khynroo wei pteiñ ki hadooh wa heh ki kam i chait i khiah i pyrkhat pyrdaiñ namo yeiwa tip leh kam i Mental Health iwa man katni ki por wa da joor bha, haap yaklam leh yow lait na i yoh khon dang khian rta, i yada na u khniang HIV, i baam ya ki baam wa tei yei doh i pran kamjooh wow yait ya ki jait dih wa ktah yei doh i pran. Waroh kini toh kiwa ye u yada wow sumaar lada kam ki manbei manpa, kiwa ha yung ha sem, kiwa sikai skur, kiwa kreh ha ka kaam i chait i khiah hadooh kiwa pathai khubor krehlang ki wow wanrah yei kylla haka imlang sahlang.
Ka Annie V.B.R Chullet, Organizing Secretary JCH DM&HO, Jowai CNE Cell, S/N Jowai Civil Hospital ha i klam wa tbian wa e ko da ong ko wa i thmu yong kani ka Conference toh wow pynjanai yei e chakri cha ki khynroo khyllood iwa emkaam bha ha kini ki por wei wow sñiawthooh leh ya i chem chitom wow leh ya ini waroh yow lait na i jia wa sñiawsih.
Hadien won da yoh yei klam na Dr. E.War wa klam hajrong ka phang “Anatomical and Physiological changes, general health risk and health problem during adolescents”. Dr. S.D Sumer wa klam hajrong ‘Reproductive Health for Adolescent”, Dr. A. Hing hajrong ka phang “Preventive Health Services for Adolescent in the Community”, Dr. R. Pohsnem hajrong ka phang – “Barriers to accessing health care among adolescents and quality of care for adolescent including AA-HA”, ka T.S Sutnga da klam ko hajrong ka “Juvenile Justice Act”, ka T. Nongkhlaw-Psychology da klam ko hajrong ka “Behavioral changes, mental health problem and health risk adolescent” katwa ka D.H Lyngba da klam ko hajrong ka phang “Nursing Management of common Health Problem for adolescents”.
Discussion about this post