Khliehriat: U District Magistrate, East Jaintia Hill District da pyntip paidbah u wa neidaw wa em uwi wa yoh COVID-19 ha i thaw wa em ha Meghalaya Cement Limited (Topcem Cement) Chiehruphi/Thangskai wei uni u bru leh toh uwa da tyngkheiñ yaki kyndon ka Quarantine deiwa lai u cha kiwi ki thaw heipor wa leh Quarantine u wei da yachem u leh wa kiwi ki bru hapoh kani ka Cement Plant wa kiwi ki thaw.
Kamtæ ka chnat Health and Family Welfare da kyntu ko wow pynman yaka Meghalaya Cement Limited Complex (Topcem Cement) Chiehruphi/Thangskai kam ka Micro Containment Area yow ye u pyndep yaka Contact Tracing ya kitu ki bru wa yachem wa uni uwa yoh COVID-19 yow ye leh u pyndep yaka Antigen Test/RT-PCR Test ya waroh kiwa em hei maa kamjooh kiwa ym em hei maa.
Chooh da pyntip wa uni u bru toh uwa lai cha kiwi ki bynta ka District kamjooh cha kiwi ki District ka jyllla.
Kamtæ u District Magistrate ka East Jaiñtia Hills da pynmih hukum u wow pynbna u yaka Meghalaya Cement Limited Complex (Topcem Cement) kam ka Micro Containment Area yow khang yei psiah i mih chapoh kani ka thaw khlem da yoh bor nadooh pyrdi synyaw ka 9th August, 2020 hadooh 6:00 AM ka 13th August, 2020.
Katkam kani ka hukum ym chah ya kiwon kiwon ki bur paidbah wow psiah chapoh ka Meghalaya Cement Limited Complex (Topcem Cement) wei kiwa em wa sah hapoh yong ka ym chah yaki wow mih ki cha lait wei wow neh bait ki hapoh ki thaw wa sah ki.
Ym chah leh wow pynman ya kiwon kiwon ki yalang paidbah, ki kaam khayi pateiñ, u wai yaki dukan.
Kani ka hukum chah ko ya ki wakreh u Deputy Commissioner, East Jaiñtia Hills District wa kynthup ya ki wakreh ka Medical and Health Officers, District Tracing team, Medical Officers waki Medical Front Line Workers kiwa em Duty ha kani ka Cement Plant. Ym em khang leh yaki pulit ka East Jaiñtia Hills District kiwa leh yei kaam yong ki.
Ya kiwa leh pyrchah daw pynchitom katkam ka aiñ Disaster Management Act, 2005 wa kiwi ki kyndon ka IPC.
Kani ka hukum u krehkaam ko nadooh ka 9th August, 2020 hadooh wa pynmih hukum da kamwi.