Ka yalang ka Kur Sutnga 14 Khrong Sumer Circle kawa phra da pynman ha ka chnong Shyrwang ha ka 25 tarik uni u bnai. Ka Kur Sutnga 14 khrong Sumer Circle toh kawa em ha poh ka Elaka Sumer, East Jaiñtia Hills.
Ha katai ka sngi da ya emlang leh ki Unit waphær waphær kam ka Samasi Unit, Moolait Unit, Mookhain Unit, Mynthlu Unit, Kremmyrsiang Unit, Lakasein Unit, Mooriap Unit, Umkyrpong Unit, Kseh Unit, Pala Unit, Shyrwang Unit, Khahnar Unit waka Mooknor Unit deiwa emlang kiwa kitkaam kamjooh.
Da synraan lang da ki waheh ka kur nadooh u Apmit Pakem uwa man leh u President kur, u Amnesty Salahe kam u Secretary kur, u BWC Salahe, u Ready Salahe, u Defender Pakem, u Charles Pakem, u Damon Salahe wa kiwi de ki para kur.
Ha kani ka sngi da yaklam leh ya ki rukom krehkaam ka seiñ kur hapoh ka Sumer Circle, wei da pynkha ya ka Sports Committee hapoh yong ka seiñ kur.
Da yoh leh yei sneiñ kyntu wow pyrchang u yatylli kawi donhi kam ka kur yow nang heh nangsan hei lai luti yong ka kur kam kawi donhi, wei wa da kitbok kitrwiang ya ki para kur wow nang roi ki haki kaam ki jaam, ki puræ puthi wa kiwi de ki jait kaam.
