Jowai: Ka Meghalaya State Network of Positive People (MSNP+) chirup i krehlang waka District Administration East Jaiñtia Hills District wei i kyrchaan daka Meghalaya AIDS Control Society (MACS), ynnin ka 30 tarik da pynman ki yaka yalang pynsñiawthooh wa chisngi ha DC Conference Hall hajrong ka phang ‘District Level Network with District Govt. Officials on Social Protection and other Related Challenging Issue of PLHIV Community’ namo wow pynsñiawthooh ya ki sahep sorkar kammon wow yada, u yarap wei wow sñiawthooh ya ki bru wa im wa u khniang HIV.
U SS Syiemlieh wa pynlai yaka yalang hawa e ya ki kyntien waiphang da ong u wa kam kani ka yalang man kawa emkaam bha neibynta ki bru wa em ya u khniang HIV kamjooh ya kitu ki wym em leh neibhah deiwa ya chemlang kamni ki sahep yoh ki u batai bniah chaphang ki jait yarap waka ophis yong ki ye ko u e yarap cha kiwa emkaam yarap. Heijooh i por da kyrpaad u leh yaki bru wa ym hoi u pait næ yoo beiñ ya kiwa em ya uni u khniang neibhah ki leh em ki ka hok wow im kam kiwi tawan ki bru. Da kyrpaad u yaki sahep sorkar wow kyrchaan pura ki yaki lyngba ki Scheme wa boonjait wa ye ka sorkar u e.
U Bari Leslie Kharmalki General Secretary MSNP+ da batai che u chaphang ki aiñ hei yatoh waka HIV, kamjooh yei rukom sumaar, ki thaw sumaar hei yatoh wakani ka kjut.
Ka Iada Warbah, Assistant Director Care Support Treatment napoh ka MACS da ong ko wa ha Meghalaya da em artylli ki thaw e dawai HIV næ ki ART Centre ha Civil Shillong wei ha NEIGRIMS wei ym slem ha Jowai leh dow yoh ki ya ka ART Centre.
Da ong haroh ko wa du napoh East Jaintia Hill da em haduh 1145 ngut kiwa da Register ya i de hapoh ART Center Shillong wei 1233 ngut na West Jaintia Hill.
Ka thong wa pynman ya kani ka yalang toh yow pynsñiawthooh yaki bru wa em ya uni u khniang wow mih ki chakhmat yow wan chim yaki laad yarap wa e daka sorkar khnang yow pynku ya ka rukom im yong ki. Kamjooh leh yow ye ki u yieñ haki kjat yong ki hi.
Ya ka yalang ha kani ka sngi da pynlai da u SS Syiemlieh, ADC EJH District, chirup i emlang ki sahep sorkar naki chnat waphær waphær yong ka EJH District, kiwa mihkhmat naka MACS Shillong, ki dkhot ka MSNP+, JNP, MCSWA TI CC Khliehriat wa kiwi kiwi. Ya ki kyntien pdiang da e daka R. Patlong Field Mentor FHI 360.
Neiliang ki chnat waphær waphær wa kynthup yaka chnat Fishery, DM&HO, Social Welfare, District Child Protection Unit wa kiwi dawan batai ki yaki jait Scheme waphær wa ki e yarap ki cha ki paidbah.
Discussion about this post