Ynne ka sngi ka Computer Committee, yong ka Meghalaya High Court chirup i krehlang ka Meghalaya State Legal Sevices Authority da pynman ko yaka e sikai hajrong ka ‘Case Information System Services’ ha Tpep Pale, Jowai heiwa da pynlai ya kani ka e sikai da ka Jaiñtia Hills Autonomous District Court, Jowai hei emlang u Justice H.S. Thangkiew, Judge Meghalaya High Court, u Justice W. Diengdoh, Judge Meghalaya High Court Shillong, ki muktiar na West Jaiñtia Hills District wa kiwi kiwi.
Kani ka Case Information System toh yow pynsuk yei krehkaam katkam wa yah ka juk wa katni, yow ye u pait Online man i long ki mukotduma (Case), u pait yaki rai ki hukum (Order) heiyatoh wa ki mukotduma, ka tarik wow chong bichaar wa kiwi kiwi.
Ka V. Kyndiah, Additional Judge, Additional District Council Court, hawa e yei klam lamphrang da pyntip ko wa yaka CIS haka District Council Court da sdang ya ka la kamwa 3 bnai kattu wei da em kamwa 333 tylli ki mukotduma wa dadep em ha ka.
U Justice H.S. Thangkiew hawa e yei klam da ong u wa kani ka CIS System da man kawa krehkaam ha ki District kylleiñ ka ri India deiwa pynrap leh wa ka District Council Court da pynkrehkaam ya ka katkam ka Sixth Schedule ka riti synchaar ka ri neibynta ki jaitbru ri-loom ka jylla katkam ka Paragraph 4 waka 5 wa ki dustur ki jaitbru.
Heiyatoh waka CIS da ong u wa kamwa waroh ki bru hi du kiwa em Smart Phone, kamtæ emkaam u chim kabu ya kam kini ki laad yarap wa yoh ha kti khlem da lai mih de cha ki yung Kasari namo ki Court.
I batai bniah hajrong kani ka CIS da yoh na ka Daphira Sohtun kawa man leh ka Secretary, District Legal Services Authority and Central Project Coordinator katwa ya ki kyntien khublei da yoh na ka S.A. Challam kawa man ka Magistrate First Class ka District Council Court, Jowai.
