Ynne ka sngi da man ko ka sngi wa phooh wa phieñ ha Shangpung College wa em ha Nongrim, Shangpung heiwa da leh emburom wei da lehkmen ya ka World Environment Day 2026 deiwa wan sakhi ki khynnah skur, kiwa sikai, kiwa kreh yong ka College wa ki paidbah wa chong chnong hi waroh kawi.
Ya kani lehkmen da pynman da ka Shangpung Cricket Association deilang wa ka NPYF yow pynyoo yei kitkhia wei wow leh khooid leh jngiar, u yahluti kammon u leh i yow ye u pynneh pynsah wei ri sumaar ya ka bei rymaw wei kani da pynman deilang kam chibynta ka ‘Khet Bachao Abhiyan’ wa da pynman da ka KVK Jaiñtia Hills.
Ya kani ka yalang da pynlai da u Budmiki Sutnga uwa man leh kam u President yong ka Shangpung Cricket Association wa u Organising Secretary ka NPYF wei neiliang u Principal yong ka Shangpung College, u Dr. DG Lyngdoh da e u yei klam pdiang sñiawbha ya waroh kiwa wan cha kani ka yalang.
Da yoh leh yei klam na u Executive Engineer PWD (Roads), Shangpung Division, u K. Pakma wa na u MDC ka thaaiñ, u M. Sutnga, uwa man leh kam u Guest of Honour kiwa da kyntu u ya ki paidbah yow man i ki bru kiwa khyrngiat yongbru noh yow thooh laad chiboon jait wa kammon u ye i u yada ya ka bei rymaw yong i.
Chooh chooh da yoh leh yei kyntien e mynsien na u kongsan, u Comingone Ymbon, MLA uwa da klam bniah chaphang i eh wa chem i nei kylla yong ka suiñbneiñ katwa dang mih ki sngi deiwa em ka Climate Change. Da pynbor u leh wow lehkhooid i ya jar jiar ka yung ka sem wot ha ki luti syngkieñ leh, wei da ong u leh wow sangeh i yei thang khloo cha loom neidaw wa daw ktah ko ya ka mariang yong i.
Hawa poi cha ka wakut yong kani ka yalang, u Dr. Rimiki Suchiang da e u yei kyntien khublei deiwa klam leh chaphang ka ‘Khet Bachao Abhiyan’, deiwa pynkynmoo u yei kaamram wow yada ya ka khyndaw, ki hali ki pynthor wa ki kpær rep i riang yong i, yow man kiwa rep kiwa chait wa khlan wei yow ku ka ri India yong i ha waroh ki liang.
Discussion about this post