Jowai: Ka lehniam Behdieñkhlam ka Raij Mukhla ynne ka sngi Mulong ki khon ka Raij da wan pam wei da wanrah ki ya ki artylli ki Dieñkhlam Blai, uwi da u Dieñ Chyrngaiñ uwa man uwa khian ya uwa tip kam u Dieñ Blai namo u Tre Blai.
Hadien ini da pynbood won sa uwi u Dieñkhlam uwa rap heh wei ya kini ki Dieñkhlam da pynpoi ya ki heipor 2:00 waje i sngi ha Madam Tih Khyndaw wa ya u Dieñ Chyrngan da booh ha Madan Ryngkaw.
Manda dep ini da pynman yaka Dorbar Niam heiwa da yaklam won ya ki kaam neibynta ka Sngi Musiang ka sngi Chaad Sngi wei kamjooh leh ka sngi wow pynyieñ ya ki le tylli ki Dieñkhlam, uwi u Dieñkhlam daw rah paidbah na Mukhla Umlangshor.
Ya kani ka Dorbar Niam da pynlai da u Pa Langdoh ha ryngkat ki wasan yeiwa da pynbood won da ka ngooh ka dem wow kyrpaad ya u Syiem Khlam Ram Shyllong wa ya u Syiem Ryngkaw kiwa man ki Blai wa kær wa daa ya ka Raij Mukhla wa ki khon ki rayot ka Raij ka Muluk.
Mynstep ka Chaad Sngi u sdang ko nadooh 10:30 i step heiwa u sdang chaad na Madan E-iadaw heipor 11:00 waje heiwa daw lai cha Mukhla Chohchrieh, Umlangshor, Ladmukhla wei wow pynkut ha Mukhla Nongrim hadien won heipor 2:00 waje i sngi u pynyieñ ya ki Dieñkhlam.
Hadien ini daw pynbood biang ya ka Dorbar Niam ka wow ya klam neibynta ki kaam ha ka sngi Muchai ka sngi ka wow pynkut ya kani ka lehniam.
Discussion about this post