Ka seiñ Jaiñtia Students’ Movement-Western Region ha ka 22 tarik uni u bnai da pynman ko ya ka yalang e kular wow pynskem ya kitkaam neibynta ka samoi 2023-2026, heiwa da pynlai ya ka yalang da u Working President, Central Body u Jimmy Raul Kharmuti, wei da yoh ya ki kyntien pdiang burom na ka Syllimon Challam, kawa man kam ka Publicity Secretary ka seiñ, ryngkat i emlang u President Rangbah, u Leningstar Rymbai, u General Secretary u Roitre Dkhar, u Chief Organising Secretary u Pillarstone Phawa wa kiwi kiwi.
Ya kani ka yalang da pynlai da u Terence Sawian uwa man uwa e buit ya ka seiñ wa u Legal Advisor ka Western Region, u Fivestar Suiam.
Da yoh ya i klam na u Working President, u Wanpoi Lyngdoh, na u Senior Advisor ka seiñ u Terence Sawian uwa man leh uwi na ki bru wa kreh haphrang dooh neibynta ka seiñ.
Da yoh ya ki kyntien na u President Rangbah, u Leningstar Rymbai uwa da khana tbian ya ka parom wa ki kaam ka seiñ wa kynthup ya i dawa Government College ha East Jaiñtia wa kiwi kiwi.
Da ong u leh wa ka seiñ chakri ko ya ki paidbah nadooh wow yada ya ki thaw ki chyiap wa i rukom thung kreh wa kiwi kiwi.
Ha kani ka sngi da yoh leh i klam wa tbian na u General Secretary, u Roitre Dkhar uwa da kyrkhu kyrdoh wei kitbok ya waroh kiwa kitkaakm ka seiñ neibynta ka samoi krehkaam wa 2023-2026.
Neiliang u President, u N. Ribok Biam hawa e i klam da ban joor u ya i yatylli hapyrdi ka jaitbru wei wow krehlang chirup wa ki chnong khappood.
Ha kani ka sngi da yoh ya ki kyntien khublei na u Vice President, u Pynjur Suchiang wei da kbai leh ya ka thong krehkaam ka seiñ da ki dkhot wa kiwa kitkaam yong ka.
