Da pynskem yaka KSU Delhi, yoh President ka Marbiang Khongwir ka kynthai wa nyngkong wa yahkhmat yaka Unit

Jowai: Ka Khasi Students’ Union (KSU) seiñbei haka 26 tarik uni u bnai da yoh ko wow pynskem biang yaka Unit haka nongbah New Delhi kawa da pynman ha New Delhi heiwa ka Marbiang Khongwir da chim ko yaka kaam President wei da man ko ka sien wa nyngkong wa ka kynthai da chim ko yaka lyngkor wow yahkhmat yaka seiñ khamtam ha Delhi. Ha kani ka sngi da em leh i yachem lang ki khynroo khyllood Khasi kiwa puræ wa ki wakreh ha New Delhi kawa da pynman leh daka Unit wei da emlang u Lambokstar Marngar, President seiñbei kam u kongsan, u Manly Nongpluh, Finance Secretary seiñbei kam u symbood kongsan, u Ruben Najiar, CEC Member ka seiñbei, u Kynpham V. Kharlyngdoh, muktiar ka Supreme Court u President wa nyngkong ka Delhi Unit wa kiwi kiwi ki bru waheh wa ki manbei manpa kiwa pynchit pynchngaiñ ya katai ka sngi wow ya tipmit lang para doh para snam.

Ha i klam kam u kongsan, u Lambokstar Marngar da e u ya ki ktien kyntu kynpham yaki khynroo khyllood kiwa wan puræ kamjooh wow kreh ha New Delhi deiwa ong wa ym toh u mylliñ yaka akor ka burom wa i tre i thied wa wan i. Da yaroh u leh yaka KSU Delhi kawa dang ku hadooh ini i por wei ki daw waroh toh wa dang em ki khynroo khyllood kiwa em i kitkhlieh wei wa em chaniah ki paidbah ha ka seiñ.

Ha kani ka sngi da yoh leh ya i klam na u symbood kongsan, u Manly Nongpluh uwa da kyrkhu kyrdoh wei da yaroh u yaka Marbiang Khongwir kawa man leh kawa kitkaam ka Girls’ Wing ha Shillong wa ka dkhot ka Laban Circle wei ka Laban Circle da pynkup burom ko leh yaka hadien wa da shimkti ko yaka kaam President ka Delhi Unit.

Da yoh leh ya i klam na u Kynpham V Kharlyngdoh, Muktiar ka Supreme Court uwa jooh man leh kam u President wa nyngkong ka Delhi Unit wei da e mynsien u leh ya kiwa wan puræ wei wan kreh ha New Delhi deiwa kyntu yaki wow ya tylli wei wow kynmoo yaka jaitbru.