Shillong: Hadien palat 24 kynta wa u Doctor waheh yong ka Bethany Hospital, da khlaad noh u na i yoh kjut wa chah ktah ha u COVID-19, ynne hei sngi da yoh wow tlep emburom ya u Dr. John Sailo Ryntathiang ha loom tlep-bru ka Balang Presbyterian Riatsamthiah ha Lawmali, Shillong.
Ya i met yong u Dr. Sailo da wan pynkit wei da tlep da ki wakreh ka Shillong Municipal Board (SMB) kiwa da spaiñ da tymmoh bha, katwa i pynkhreh ya katai ka thaw tlep da leh da ki bor District wa ki pulit kiwa da chong ha katai ka thaw palat 12 kynta nadooh ynnin i miet wow pynbiang ya iwa emkaam.
I pynkhreh ya katai ka thaw tlep da sdang nadooh ynnin i chiteiñ synyaw yow yoh u pyndep noh i met yong u Dr. Sailo, tangwa neidaw wa miet, i em moo waka um ym ye wow pyndep ya i thlu ha i por wa da booh, iwa da pynman ya ki bor District wow pynpoi noh da ka pooh-chiloom.
Ya katai ka thaw tlep da ye wow pynyoh da i chimkhia yong u General Secretary ka Synjuk ki Nongsynshar Shnong ka Bri Hynniewtrep (SNSBH), u RL Blah uwa da yaklam wa kiwa yahkhmat ka Balang Presbyterian.
Ya ka lehniam da yah da u Rev. E R Tynsong uwa man u Pastor wa pait ya ka Balang Presbyterian Riatsamthiah ha i ktien Khasi, katwa ha i ktien phareng da yah da u Rev. Lyndan Syiem uwa man u Pastor wa pait yaka Balang Presbyterian Mawroh wa i duwai pynkut da e da u Tbn. W Kharlyngka.
Ha ini i leh niam khaddooh, ya i met wa sah yong u Dr. John Sailo Ryntathiang da synran lang leh da ki ar ngut ki Magistrate ka East Khasi Hills wei sonteri leh da ki bor pulit.
Discussion about this post