Ka seiñ kiwa kamai Taxi kawa tip kam ka West Jaiñtia Hills Taxi Owners and Drivers Association (WJHTODA) da pynbyna ko wa da pynbait thymme ya ka bai kari ha chnong Jowai ka wow krehkaam nadooh ka 02-05-22.
Ka bai kari toh kawa da pynku naka T. 10 cha ka T. 20 (Down Trip) iwa mut hawa hiar lane wa lai cha Iawmusiang.
Neiliang yong ka Association hadien wa dadep ko wow chong pyrkhat ha waroh ki liang sñiaw yahaap ko wow pynku yaka bai kari neibhah ka yaw kamai katni man ko kawa hiar hadooh kattæ kattæ, katwa i dor yong ki mar ki mata leh man ki kiwa da ku dor na kawi ka sngi cha kawi khamtam i dor yong i Petrol iwa da ku khlem sangeh.
Kamtæ da ong wa ini waroh da pyndooh nong ko chiboon ya kiwa kamai kamjooh ya ki tre kari, kiwa ha kini ki por man ki kiwa dooh mynsien hawa pyrkhat ki kamon wow khih yow ye u pyndap ha yung ha sem.
Hapyrdi ini i eh i khoo, ka seiñ khut ko ya phi ki paidbah yong ka chnong Jowai wow ya ksohkti deilang heiyatoh wa i rukom pynbait khnang waka seiñ yow ye ko wow kynrong yei kaam yong ka chakhmat.
