Jowai: Kamwa man, dang lai ki por ki sngi ki chnong dang heh dang kmai ki kamtæ da pynmih wei da bhah noh ya ki ha ki kyntoit kamjooh da pynmih ya ki chnong.
Ha ki yung ki sem leh man i i jooh heiwa da ya roi ki manyung mansem, kamtæ da poi i por wow pynyakhlaad noh ya ki jar jiar, kamtæ ynne ka 25 tarik u man ko ka sngi wow sahkynmoo ya ar tylli ki manyung hapoh ka Raij Jowai heiwa da pynkhlaad namo i mih Yung Blai noh ki.
Ini i mih Yung Blai daw pynsuk i ya i pyndep yaki kaam hapoh ka yung ka sem khamtam ka kaam niam kaam rukom wei yeini da leh kamwa da yah na kiwa rim kiwa nachwa.
Kini ki ar tylli ki manyung kynthup ki ya kawi na ka kur Pde ha Chilliangraij katwa kawi won na ka kur Passah ha Panaliar wei da mih ki da i bha i miat khlem em iwon iwon i thut i boh.
Ha ini i pynyakhlaad Yung Blai da pyndep da ka Dorbar Niam ka Raij Jowai hapoh i yahkhmat u Dolloi ka Elaka Jowai, u Puramon Kynjing, u Pator, u Langdoh, ki Wasan, wa kiwi kiwi.
Kiwa mih Yung Blai ha ka kur Pde ka kchu ka siang toh ka Silbi Pde kawa da mih na ka Meribel Pde katwa u kñi u K.C Roy Pde da mih u na u kñi ka Yungblai u Lambor Pde.
Ha yong Passah won ka kchu ka siang ka Chitmon Passah da mih Yung Blai ko na ka Emphiroit Passah katwa u kñi won toh u Kermon Passah da mih u na u S. Trueman Passah.
Ha ka lehniam da sdang deiwa e ya u tylli u kyntien (5 sla pathi chi uwi u Kwai) wei da rah ha u khri wei da e ha u kñi na Yung Blai ha u kñi wa da mih Yung Blai.
Yeini da pynbood won da i pynkup ya ka Ryndia Tlem da u kñi na Yung Blai ha u kñi wa mih Yung Blai.
Ya ki tiar niam da booh ha u chang kiwa kynthup ya ka ja pliang-naar, u luta, ka dabor naar da e na ka Kchu ka siang na Yung Blai ha kti ka kchu ka siang wa mih Yung Blai.
Da pynmih won ya ki 3 tylli ki luta wei da e uwi ha u kñi na Yung Blai uwi ha u Dolloi uwi ha u kñi wa mih Yung Blai iwa pynbood won ya ki Klong Skoo wa em pyrnah wei da e ha kiwa emlang ha kani ka lehniam.
Hadien ini da pyndep ya ka ngooh ka dem da u Dolloi wei da pynbood ya ki kyntien kular hapyrdi kini ki ar tylli ki manyung yow ya maya wei wow ya kheiñ ya ka ratap jar jiar kamwa jooh leh iwi ya iwi nachwa wow mih Yung Blai.
Hadien wa mih Yung Blai kini ki manyung wa mih u pyndep ki yaka niam ka rukom yong ki ha jar jiar ki yung yong ki.
Discussion about this post