Jowai: Ka lehniam Behdieñkhlam ka Raij Jowai ynne dang step ka Musiang 15 tarik da pynyieñ ya ki Dieñkhlam ka Bon ha yong Rngad Wah, ka Doh ha Yung Langdoh iwa pynbood ya ki Dieñkhlam khian ha man la ki thlu yung. Hadien wa da pynyieñ ya ki dieñkhlam khian ki Khonraij da lai thooh ki ya ka Symbood Khnong wow pynyieñ ya ka ha Khliehchnong.
Heipor chiteiñ sngi ki Kmai Raij da yachem lang ki ha Myngkoi Pyrdi, Iongpiah wow pynkhreh u lithooh ya ki dieñkhlam wei hachwa u mih na Myngkoi Pyrdi da em ka yalang tbian heiwa da em u PCCF ka jylla u SC Marak, ki waheh wasian, wa kiwi kiwi hei yatoh wa ka Behdieñkhlam.
Manda kut ka yalang tbian ki Kmai Raij da mih ki neini wei da lai ki cha Iawmusiang wow rah ya ki Dieñkhlam heiwa da chaad leh ha waroh ki thaw lehniam ka Raij kam ha Biar ka Blai, ha Datlawakor, wa kiwi kiwi ki thaw.
Hadien wa da pynpoi ya ki Dieñkhlam ha Madansiatthong ki Khonraij da lai li thooh ki ya ka Khnong Blai na Loom Sooiung yow rah ya ka cha Madan Poh-Sawiar.
Manda poi ha Madan Poh-Sawiar u Dolloi da e u yei ngooh i dem wei da ekti u yei pyrnah Khnong Blai ha u Kñi ka kur Nikhla wow e u ka ngooh ka dem wa ka suit ka choor ha ka Khnong Blai wei manda dep neini ki Khon ka Raij da rah ki jar jiar ki Dieñkhlam.
Ki khon ka Raij dei mynsien ya maya wei i yatylli da rah ki ya ki Dieñkhlam nadooh na Madansiatthong, ha Biar-ka-Blai hadooh wa poi jar jiar ki chnong yong ki.
Manda mih lut ki Dieñkhlam na Madansiatthong ki Khonraij da rah ki ya ka Khnong Blai wow pynpoi ya ka ha Madan Moosyiem, wa em haphrang ka Yungwalieh ka Chilliangraij heiwa ki manbei, kynthai wa khynnah da e ki yei ngooh i dem ha ka Khnong Blai.
Neiliang u Pator da ekti u ha u Kñi ka kur Nikhla yei pyrnah wa da pynkhreh u wei neiliang u Kñi da e u ka ngooh ka dem ka suit ka choor ha ka Khnong Blai wow paan i kyrkhu kyrdoh, wei wow da wow kær ya ki khon ka Raij khamtam ha ka Muchai hawa hiar ki cha ka Syiem Aitnar.
Discussion about this post