Ynne ka sngi, ka Jaiñtia National Council-Western Zone hapoh i yahkhmat u President, u Leo Ferdinand Dhar wa u General Secretary, u Heibormi Lyngdoh da lai pait ki yei thaw wa chna yaka Mini Secretariat ha Jowai heiwa da chem wa i kreh toh iwa da sdang.
Ka seiñ da ong ko wa ha u Naikhynde 2023 ka seiñ da lai yachem ko wa u Symbood Montri Rangbah, u Sniawbhalang Dhar yow dawa sdang chna noh ya kani ka Mini Secretariat.
Ka seiñ da e khublei ko yaka sorkar wa da chimkhia ko hajrong ini i kaam tangwa da kyrpaad leh yaka sorkar wym toh u ieh ko yei chna chiteiñ luti tangwa wow pyndep kamwa da angnood da ki paidbah.
Da dawa leh wym toh u leh chiliang wei wow chna ha Jowai deiwa pynlut i jooh kamwa da leh ha Tura.
Ka seiñ da dawa ko leh wow pyndep chna yaka Iawmusiang Shopping Complex neibhah da dep wow pynkhreh leh yaka mang tangka wa thymme niebhah da em 600 tam ki bru wa chong dukan ha kani ka yaaw chwa wow tympra ka.
Da dawa leh wow paan poisa chooh chooh neibynta ka Smart Town ha Jowai kamwa da yoh ha Tura wei yeini toh u chimkhia da u MLA ka Jowai, u Wailadmiki Shylla.
Discussion about this post