Ha ka sien wa nynkong, ka jylla Meghalaya da sakhi ko ya ka tamasa pynyoo baiscope namo ka 1st Meghalaya International Film Festival ya kawa da pynman da ka Meghalaya Filmmaker’s Association chirup wa ka Meghalaya Tourism heiwa ya kani ka tamasa da pynman ha U Soso Tham Auditorium, Shillong heiwa u Montri ka chnat Tourism wa Arts & Culture, u Paul Lyngdoh da man u kam u kongsan.
U Paul hawa e yei klam da ong u wa ka Meghalaya hanla man ko ka jylla wa chong ki la’oh (Abode of Clouds), da man ko leh ka jylla wa chong ki sap wa har rukom. Da ong u wa ka International Film Festival toh wow lehkmen neibhah ka jylla da pynmih ko chiboon ki khloor ha ki kaam pynwyrngia ha i dur ki phlim kiwa ye ka jylla wow yakhun wa kiwi ki thaw ha ka ri wa cha kiwa cha baar.
Da ong u leh wa ka International Film Festival toh ka kabu ksiar wow pynyoo ya ki rukom im wa kyrpang kamjooh ki thaw uiñke suwari ha ka jylla deiwa pynchlur leh ya ki khynroo khyllood wow chim kabu ki ya kani ka tamasa wow pynku ya ki kaam chna phlim hapoh ka jylla.
Heijooh i por da ban joor u wa ka sorkar da chimkhia ko wow chna ya ki Art Cinema Hall ki wow pynku ya ki kaam chna phlim wei ynne ka sngi pynyoo i wa ka Meghalaya man ko ka jylla wa em ki sap wa ki bru wa chemphang.
Da pynchlur u leh ya ki khynroo khyllood wow yoh mynsien na kani ka tamasa kawa daw yarap wow pynku ya ki kaam chna phlim hapoh ka jylla.
Kam wow kdaw heini ka 1st Meghalaya International Film Festival u pteiñ ko sa 5 sngi ha ki 4 thaw heiwa daw pynyoo hadooh 40 tylli ki phlim.
