Jowai: Ka e dawai Ñiangpyrchit kawa tip kam ka Measles Rubella Vaccination Campaign da sdang ya ka ynne ka sngi hapoh West Jaiñtia Hills da ka yalang wa pynman ha North Liberty Higher Secondary School, Jowai.
Ya kani ka Measles Rubella Vaccination Campaign da wan wai da Puramon Kynjing, Dolloi ka Elaka Jowai wei da em leh u West Jaiñtia Hills Deputy Commissioner u LSN Dykes Garood IAS, u WJH Superintendent of Police u Lakador Syiem, u District Medical Health Officer u Dr. S.S Nongbri, ka Dr. (Mrs) V.J Laloo, District Immunization Officer, u Dr. Sharad Babu, RRT WHO, u Brand Ambassador ka Measles Rubella Vaccination Campaign u Konel Phira wa kiwi ki sahep sorkar.
U Dolloi hawa e u yei klam yong oo da ong u wa da toh i por wow ya ksoh kti lang yow pynkylla yei rukom pyrkhat yow wanrah yei kylla neibynta ka mynried wa bha. I kitkhlieh wa da chim da ka tnat i chait i khiah wow pyndep ya kani ka kaam toh neibynta ka juk wow wan kamtæ da kyntu u ya waroh ki manbei manpa wow krehlang lang ki wei wow chaniah ya ki Doctor wa kiwa kreh ka tnat ka chait ka khiah.
Neiliang u Deputy Commissioner u LNS Dykes Garod da kyntu u leh ya ki manbei manpa wym toh u ngait ki ya ki khubor hamsaya neibhah kani ka e dawai da emkaam wow pynwiar jait noh ya kani ka kjut.
Ka Dr.(Mrs) V.J Laloo, District Immunization Officer ha ki ktien waiphang ko da ong ko waka sorkar India da sdang ko ya kani ka Measles Rubella Vaccination Campaign yow pynduna ya i kjut Ñiangpyrchit wei wow pyndooh jait noh ya ini i kjut ha u snem 2020. Hapoh ka district da mang wa hadooh 1.26 Lak ngut ki khynnah kiwa em nadooh 9 bnai hadooh u 15 snem ki wow yoh dawai tika.
Ka Dr. E.War, Pediatrician, Jowai Civil Hospital Ialong da pynchlur ko ya ki khynnah wym toh u tieñ ki neibhah du iwi i inject daw yada ko hadooh kiwi ki juk wow wan.
Ka yungkrehkaam u District Medical Health Office da jied ki leh ya ki ar ngut ki Brand Ambassadors naka skur North Liberty School u Marso Kyndait uwa yoh ya ka Gold Medal ha ka 1500 Meter Race ha National Level Athletic Meet East Zone 2018 wa u Dabit Dkhar uwa yoh Bronze Medal ha ka 2000 meter Race ha ka National Level of Athletic Meet East Zone ki wow rah ya ka khubor chaphang kani ka e dawai hapoh kani ka skur.
Discussion about this post