Jowai: Ka lehniam Behdieñkhlam ka Raij Mukhla da sdang ko ynne ka sngi deiwa pynman ya ka Dorbar Niam i yong ki khon ka Raij ha Madan Ryngkaw, Mukhla Nongrim hajan ka Khloo Kyntang.
Ya kani ka Dorbar Niam da pynlai da u Pa Langdoh uwa man uwa ha khlieh ka niam wei da synraan ya oo da ki wasan yong oo ya kiwa da khut ki waheh Sankur, kitæ toh u Sangot, Waheh Suna, Waheh Lyngdoh, Waheh Sari, Waheh Khrong Le Yung, u Waheh Shylla, u Maji Niam, u Chutia ha ryngkat ki kñi ki pa na ki kur waphær waphær ka Seiñ Raij Mukhla.
Ha ha kani ka Dorbar Niam da embynta leh u Wailadmiki Shylla, MLA uwa man leh u khon yong ka Raij Mukhla uwa da e uya ki kyntien kyrkhu kyrdoh ya ki khon ka Raij.
Ha kani ka Dorbar da klam hajrong ki kaam wow leh neibynta mynstep, wei da jied ya ki wow lai pam ya ki artylli ki dieñkhlam na ki dong wa ki kyntoit waphær waphær hapoh ka Raij Mukhla khnang wa ki khon ka Raij u ye ki wow pynpoi ya ki na khloo ha Madan Ryngkaw.
Ha Madan Ryngkaw daw pynyieñ ya ki Dieñkhlam ha ka 27 tarik hadien wa da wanrah ya ki na khloo heiwa daw em biang ka Dorbar Niam heipor 3:00 waje nohchariñ ka sngi wow pynbait ya ki kaam neibynta ka 28 tarik.
Discussion about this post