Da sdang ka North Liberty ya ka Science Stream kawa kyrpang wow pynkhreh ya ki khynnah

Jowai: Wow wanrah wow kyntu kynrong yei stat i tip, ha Jowai kamjooh leh ha ri-loom Jaiñtia waroh kawi ka North Liberty Higher Secondary School da wai ko ynne ya ka Science Stream yong ka ha Mission Compound, Jowai.

Kani ka Science Stream ha kani ka skur u wai ko nadooh 9:00 waje i step hadooh 7:00 waje i miet, heiwa ki class man ka sngi u sdang ki nadooh 9:00 waje hadooh 2:30 nohchariñ sngi, neitæ won ki khynnah ye ki u kyndehke kam ki Table Tennis, Chess wa kiwi kiwi hadooh 4:00 waje i janmiet, wei ki khynnah ye won ki u chah sikai kammon u chet u tu, wa kiwi ki kaam wow pynpliah ya ki kaam yong ki wa man ka sngi hadooh 7:00 waje i miet.

U Richard Uriah uwa pyllai ya kani ka yalang wai ya kani ka bynta yong ka skur (Science Stream) da ong u wa kani ka skur daw em ko ya ki Coaching Class wa ha rukom wow pynkhreh ya ki wow yakhun ki ya ki Entrance Test kam ka NEET, JEE, wa kiwi kiwi.

Da yoh ya ki kyntien ngooh blai na u Missionary S. Bnasan Uriah, i pdiang burom na ka khynnah kani ka skur ka Aidamon Talang.

Related posts

Lai kjat ki waheh wa ki khynnah na Dkhiah West chadooh cha u mot u Kiang Nangbah

March 23, 2024

Pynphooh ka Loompyrdi Iongpiah ya ka sngi ki kynthai deiwa pdiang burom ya ka Ridamaya

March 8, 2024

U SP ka West Jaiñtia Hills u R. Muthu da ong u wa ka kani ka skur man ko i kyrkhu ya ka Jowai wa ka Jaiñtia Hills waroh kawi.

Da ong wa ka Science toh ka liang puræ kawa wailaad ya ki khynnah ha kiwa boon ki liang heiwa da e nongmuna u pynda oo ya oo hi heiwa oo da pyndep u ya ka MSC Agriculture tangwa da psiah noh u ha ki kaam pulit.

Ha kani ka sngi da yoh leh yei klam na ka M. Pde, District School Education Officer, u DC ka District u R. Rapthap kiwa da e yaroh ya ka skur wa kiwa pyllai ya ka wei da kyntu ki leh ya ki khynnah wow man ki kiwa minot ha i puræ yong ki.

Kam u kongsan ha kani ka sngi u Dr. RC Laloo hei klam, da ong u wa emkaam wow man ki kiwa raikut kiwa minot wei wow em ka thong.

Da ong u wa kani ka skur toh ka wada thrang wei angnood ka bei yong oo kawa jooh man leh kam kawa sikai skur dang nachwa.

Da yooluti u wei da kyntu u ya kiwa sikai wa emkaam u tip ki wa iwa hikai ki emkaam u sñiawthooh ki khynnah.

Da pynkut ya ka yalang da ki kyntien e khublei na u Principal ka skur u B. Richard Uriah.