Heiyatoh waka thong yong ka sorkar wow pynku yei puræ puthi katkam ka juk i stat wa katni, ynne ka sngi da sdang wow saam yaki M-Tablet cha ki khynnah skur wa puræ hei kyrdan Higher Secondary School yong ka West Jaiñtia Hills District da u MLA ka 2-Jowai Constituency u Wailadmiki Shylla.
Kini ki Tablet wada saam toh lyngba ka Scheme Digital Learning Aids (M-Tabs) yong u snem 2021-2022 wei ki khynnah skur toh kiwa puræ Class-XII ha uni u snem.
Haka yalang saam Tablet wa pynlai daka yung krehkaam ka District School Education Officer, West Jaiñtia Hills District ha District Library, Mynthong, Jowai; u Wailadmiki Shylla ong u wa i rukom kylla ka juk, yarap ko yaki khynnah u yoh yei tip i stat wa rap biang hei puræ puthi lane kiwon kiwon ki kaam i wymtoh kam ha ki por wa nachwa.
Kamtæ kamwa neiliang ka sorkar leh dadep pynbiang ko ya kini ki Tablet yei emkaam wa yatoh wei puræ puthi, yooluti u wow yoh ki chiboon i myntoi, wei u pynemkaam hok yei myntoi wa yoh naka sorkar.
Heijooh i por kyntu u wa kam ki khynnah skur wa dang hap u lai chakhmat, toh u em ki leh yaka thong hei im yong ki wei u chim yaka rai nadooh wa sdang khnang wa ka mynried u tyrchaaiñ ko, neibhah la bakla nawa sdang daw booh ko hei eh hadien habood deiwa e nongmuna yei eh i kho yong i jhep ha Jowai.
Neiliang ka District Informatic Officer, ka P. Passah da kyntu ko yaki khynnah wa la jia tyngkhooh ki iwon iwon i eh i saja heiyatoh wa kani ka Tablet toh u lai mih ki cha ka chnat krehkaam yong ka neibynta u paan yarap.
Kiwi won wa e i klam kynthup ki ya ka D.D. Syngai, MCS Additional Deputy Commissioner, u Principal ka Thomas Jones Synod College, u Kyntu Lyngdoh, ka District School Education Officer WJH ka A.P. Syiem wa kiwi.
