Jowai : Ynne ka sngi da yoh biang u sakhi yei miatdur ka kchaaid Krangsuri kamwa jooh man ko nachwa hadien wada chimkhia u DC ka West Jaiñtia Hills u Arunkumar Kembhavi yow leh yeini.
katkam wa man katni da yoh u yoo yei kaad i bynta kani ka kchaaid najrong heiwa ka um da lyiat ko na ini i kaad nakhap ki moo iwa ye u wanrah yei ma ya kani ka kchaaid. Khamtam ha kini ki por tlang da lyiat ka um na ini i kaad hadooh wa wiar ka kchaaid.
Neiliang u DC hadien wa yoo u yeini wei dei mynsien wa khia yow yada ya kani ka thaw uiñ sawari ki bru da hukum u wow pyndap yeini i kaad ha kani ka kchaaid.
Ynne hadien wada dep pyndap chibhah ini i kaad da ki dkhot yong ka Raij Buam Environmental Protection Association hapoh i yah khmat ki sahep ka DRDA wa ki sahep na ka ki bor district da yoh biang u sakhi yei miat kani ka thaw heiwa da kai ka um na khmut kani ka kchaaid.
Hei yaklam wa u DC ka WJH da ong wa da phah ya ki sahep wow li pait wow sylli ki yei kreh weiwa dang dep du chi bhah wei wow pyndep yeini hachwa ka samoi lyiur.
Discussion about this post